भांगरभूंय | प्रतिनिधी
केंद्रीय गृह मंत्री अमीत शाह हांची राज्य सरकाराक पत्रा वरवीं सुचोवणी
पणजी: अग्निविरां खातीर गोंय सरकारा कडल्यान दितात तें आरक्षण धा वेल्यान वीस टक्के करपाची सुचोवणी केंद्रीय गृह मंत्री अमीत शाह हांणी मुख्यमंत्री डॉ. प्रमोद सावतं हांकां केल्या. ते विशींचें पत्रूय तांकां धाडलां. ताका लागून राज्य सरकारा कडल्यान फुडल्या कांय दिसांत हे विशींच्या भरती नेमांत दुरुस्ती जावन वीस टक्के आरक्षण आशिल्ली अधिसुचोवणी जारी जावपाची शक्यताय आसा.
लश्कर, नौदळ आनी वायुसेना ह्या सारक्या भारतीय सशस्त्र दळांनी तरणाट्यांक भरती करपा खातीर केंद्र सरकारान ‘अग्निपथ’ ही येवजण सुरू केली. हे येवजणे खाला ह्या दळांनी तरणाट्यांची चार वर्सां खातीर भरती करतात. उपरांत निवड जाल्ल्या अग्निविरांक चार वर्सां खातीर सेवेंत कायम दवरतात. गोंयांतल्या चडांत चड तरणाट्यांनी हे येवजणेचो लाव घेवचो, हे खातीर राज्य सरकारान गोंय पुलीस, उजो पालोवपी दळ, आपत्कालीन सेवा तशेंच हेर युनिफॉर्मांतल्या सेवेंतले ‘क’ श्रेणी कर्मचाऱ्यांचे भरती खातीर धा टक्के आरक्षण लागू केलां. तातूंत वाड करून हें आरक्षण वीस टक्के इतलें करपाची सुचोवणी आतां गृह मंत्री अमीत शाह हांणी सरकाराक धाडिल्ल्या पत्राच्या माध्यमांतल्यान केल्या.
मजगतीं, केंद्र सरकारान सुरू केल्ल्या ‘अग्निपथ’ येवजणे खाला भरती जाल्ली पयली बॅच 2026 वर्सा आपली सेवा पुराय करतली. हातूंतल्या 25 टक्के अग्निविरांक सशस्त्र दळांत कायमस्वरुपी सेवा करपाची संद मेळटली, जाल्यार उरिल्ल्या अग्निविरांक केंद्र तशेंच राज्य सरकाराच्या विवीध खात्यांनी नोकरेच्यो संदी उपलब्ध करून दितले.
अमीत शाह हांचे कडल्यान मुख्यमंत्र्यांची तोखणाय
– केंद्र सरकाराच्या अग्निवीर येवजणेचो चडांत चड गोंयकार तरणाट्यांनी फायदो करून घेवचो, हे खातीर राज्य सरकारान सुरवाते सावनूच यत्न सुरू केले. ते खातीर तरणाट्यां मदीं जागृताय केल्ली.
– गोंय सरकारान अग्निविरां खातीरचे भरती खातीर धा टक्के आरक्षण लागू केल्ले खातीर केंद्रीय गृह मंत्री अमीत शाह हांणी मुख्यमंत्री डॉ. प्रमोद सावंत हांची तोखणाय केल्या. तशेंच आरक्षणाची मर्यादा धा वेल्यान वीस टक्के करपाची सुचोवणीय केल्या.
– गोंयचे तरणाटे-तरणाट्यो सशस्त्र दळांत काम करपा खातीर इत्सूक नासतात, हें लक्षांत घेवन तांची ह्या दळांतली संख्या वाडोवपा खातीर अग्निवीर म्हूण सेवा दिल्ल्यांक गोंय पुलीस, उजो पालोवपी दळ, आपत्कालीन सेवा तशेंच हेर युनिफॉर्म सेवेंतले ‘क’ श्रेणी कर्मचाऱ्यांचे भरती खातीर धा टक्के आरक्षण दिवपाचेंय सरकारान जाहीर केलें. सरकाराच्या ह्या निर्णयाक लागून राज्यांतल्या विवीध वाठारांतले तरणाटे हाचे कडेन आकर्शीत जायत आसात.
– फुडल्या काळांत गोंयांतल्या चडांत चड तरणाट्यांनी हे येवजणेचो लाव घेवचो ह्या हेतान अमीत शाह हांणी हे विशींचें आरक्षण धा वेल्यान वीस टक्के करपाची सुचोवणी राज्य सरकाराक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
