भांगरभूंय | प्रतिनिधी
बेळगांवच्यान येताच घेतली ताब्यांत; खूबश्या जाणांक घातल्या तोपी
भांगरभूंय । प्रतिनिधी
फोंडें: उसगांवचे एके लग्न जाल्ले बायलेक माशेल वाठारांतल्या एका हायस्कुलांत शिक्षिकेची नोकरी दिवपा खातीर 15 लाख रुपया घेतिल्ल्या प्रकरणांत मुख्य सुत्रधार दीपाश्री सावंत गांवस अखेर फोंडें पुलिशेचे तावडेंत सांपडली. ह्या प्रकरणांत पुलिसांनी पुलीस कर्मचारी आशिल्लो सागर नायक आनी मुख्याध्यापिका सुनीता पावसकार हांकां अटक केल्ली. सोमारा ताब्यांत घेतिल्ल्या दीपाश्री सावंत हिका अटक केल्या. तिचे कडल्यान खूबशी म्हायती उक्ती जावपाची शक्यताय आसा.
माशेलांत एका हास्कुलांत शिक्षकाची नोकरी दिवपा खातीर पुलीस कर्मचारी सागर नायक हाणें आपल्या इश्टाचे घरकान्नी कडल्यान 15 लाख रुपया घेतिल्ले. मात नोकरी मेळूंक नाशिल्ल्यान फोंडें पुलीस स्टेशनार सागर नायक हाचे आड गुन्यांव नोंद केल्लो. पुलिसांनी 27 ऑक्टोबराक सागर नायक हाका अटक केले उपरांत ताणें आपली मामी तशेंच मुख्याध्यापिका सुनीता पावसकार आनी दीपाश्री सावंत हांचे कडेन रकम दिल्ल्याचें चवकशेंत उक्तें जाल्लें. ते उपरांत 28 ऑक्टोबराक सुनीता पावसकार हिका फोंडें पुलिसांनी अटक केल्ली. सागर नायक आनी सुनीता पावसकार हांकां अटक केल्ल्याचें कळटाच मुख्य सुत्रधार आशिल्ली दीपाश्री सावंत लिपून राविल्ली. ताका लागून पुलिसांनी तिचे आड लूक आवट नोटीस जारी केल्ली. फाटल्या कांय दिसां सावन दीपाश्री सावंत बेळगांव वाठारांत आशिल्ल्याची म्हायती पुलिसांक मेळिल्ली. ते प्रमाण दोन खेपे पुलीस पंगड बेळगांवां धाडिल्लें. दोनूय खेपे दीपाश्री सावंतान पुलिसांक फटयल्ले.
सोमारा सकाळीं दीपाश्री सावंत बेळगांव सावन गोंयांत येता अशी म्हायती फोंडें पुलिसांक मेळ्ळी. ते प्रमाण मोलें तपासणी नाक्या वयल्यान गोंयांत प्रवेश केले उपरांत दीपाश्री सावंत हिका ताब्यांत घेवन अटक केली. पुलिसांनी केल्ले चवकशेंत दीपाश्री सावंत हिका दीपाश्री गांवस आनी दीपाश्री माहतो ह्या नांवान वळखताले अशें कळ्ळें. सरकारी नोकरी दिवपाचें हांयस दाखोवन तिणें खूबश्या लोकां कडल्यान व्हड रकम एकठांय केल्ल्याचें चवकशेंत स्पश्ट जालें. ताका लागून तिचे कडल्यान आनीक व्हड गुपितां भायर सरपाची शक्यताय पुलिसांनी उक्तायल्या. फोंडें पुलीस स्टेशनाचे निरिक्षक विजयनाथ कवळेंकार हे ह्या प्रकरणांत अदीक तपास करतात.
आनीक गुन्यांव नोंद जावपाची शक्यताय
फोंडें पुलिसांनी अटक केल्ली दुबावीत मुख्य सुत्रधार दीपाश्री सावंत हिणें जामिना खातीर न्यायालयांत धांव घेतल्या. मंगळारा ह्या प्रकरणाची सुनावणी जातली. मात अटक केल्ल्या दीपाश्री सावंत हिचे आड आनीक गुन्यांव नोंद जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
