भांगरभूंय | प्रतिनिधी
पणजी: मांडवींतले नवे व्हडले कॅसिनो बोटी आड थाराव घेवपा खातीर आयज जावपाची आशिल्ली पणजी महापालिकेची बसका अखेरेक जावंकूच ना. हाका लागून थळाव्या पणजेकारांनी महापालिकेच्या सभाघरांत बसून आंदोलन केलें. ह्या वेळार पुलिसांनी वाल्मिकी नायक हांचे सयत हेर कांय आंदोलन करप्यांक उखलून सभाघरा भायर व्हेले. सुमार दोन वरां उपरांत पणजेकारांनी आंदोलन तात्पुरतें स्थगीत केलें. ह्या वेळार पद्मश्री लिबिया लोबो सरदेसाय, सबिना मार्टिन हांचे सयत पणजेचे हेर नागरीक हाजीर आशिल्ले.
हे विशीं वाल्मिकी नायक हांणी सांगलें, ह्यान पयलीं महापौर रोहित मोन्सेरात हांणी कॅसिनो विशयां विशीं १२ फेब्रुवारीक बसका घेतले अशें सांगिल्लें. हाका लागून आमी सकाळीं ११ वरांचेर हांगा आयिल्ले. मात आयले उपरांत अशी बसका नाशिल्ल्याचें समजलें. आमी थंयच बसपाचो निर्णय घेतले उपरांत पुलीस बळाचो वापर करून कांय जाणांक भायर काडले. बसका जावपाचीच नाशिल्ली जाल्यार महापौरांनी आमकां फट आस्वासन कित्याक दिलें? तांचेर, पुलिसांचेर कोणाचें चेंपण आसा काय? हाच्यो जापो आमकां मेळपाक जाय अशें वाल्मिकी हांणी म्हणलें.
सरकार मांडवींतल्यो पोरण्यो बोटी वचून नवी बोट येवपाची आसा अशें सांगता. मात नवी बोट ११२ मिटर लांब आनी २७ मीटर उंच आसा. ही बोट सुमार ९ मजली इमारती उतली उंच आसा. बोटीची तांकूय पांच पटींनी वाडल्या. हे बोटीक मार्ग कडून दिवपा खातीर दोन कॅसिनोंक हालोवचें पडटलें. व्हड कॅसिनोक लागून पणजेची समस्याय वाडटली. पणजीकारां खातीर हो गंभीर विशय. हाचेर नगरसेवकांनी चर्चा करप गरजेचें. आयज जाल्ल्या प्रकारा विशीं महापौरांक पत्र बरयलां, आमी हाची फाटपुरवण करतले.
कॅसिनोंची घाण खावपाची ना: लिबिया लोबो
लिबिया लोबो सरदेसाय हांणी सांगलें, मांडवींतल्या कॅसिनोंक आमचो विरोध आसा. आमकां कॅसिनोंची घाण खावपाची ना. बरें नुस्तें खावपाचें आसा. मांडवींत कॅसिनो येवचे न्हय म्हणून आमचो लढो चालूच उरतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
