भांगरभूंय | प्रतिनिधी
मुंबय, खबरां संस्था ः मराठा आरक्षण आंदोलनाचो फुडारी मनोज जरांगे पाटील हांच्यो मागण्यो महाराष्ट्र सरकारान मान्य केल्या. कुणबी दस्तावेज मेळिल्ल्या मनशाक कुणबी प्रमाणपत्राचो फायदो दिवचो हो अध्यादेश काल रातीं सरकारान मनोज जरांगे पाटील हांचे कडेन दिलो. हाचे वांगडाच सरकारान तांच्यो सगळ्यो अटीय मान्य केल्यो. ते उपरांत पाटीलान आंदोलन फाटीं घेतलें आनी आयज वाशींत जैताची रॅली काडली. फाटले बरेच म्हयने मराठा समाजाक आरक्षण मेळचें म्हूण पाटील आनी मराठा समाजाचे लाखांनी लोक आंदोलन करताले.
मनोज जरांगे हांणी आयज दनपार 12 मेरेन राज्य सरकाराक तांची मागणी मान्य करपाक वेळ दिल्लो. आज रातीं मेरेन सरकारान अध्यादेश काडचो अशेंय जरांगे हांणी सांगिल्लें. मागण्यो पुराय जाल्यो ना जाल्यार मुंबयच्या आझाद मैदानाचेर मोर्चा काडटले अशी शिटकावणी मराठा आरक्षणाच्या कार्यकर्त्यांनी दिल्ली.
पूण सरकारान काल रातींच तांच्यो सगळ्यो मागण्यो मान्य केल्यो. मध्यान रातीं सुमार तीन वरां चर्चा जाले उपरांत राज्य सरकारान सगल्या मागण्यां खातीर सुदारीत अध्यादेश जारी केलो.
मनोज जरांगे पाटील हांच्यो महाराष्ट्र सरकारान मान्य केल्यो कांय मागण्यो….
१. मराठा समाजाच्या मनशांच्या ज्या सोयऱ्यांच्यो जातीच्यो नोंदी मेळूंक नांत, तांकां जात प्रमाणपत्र दितले.
२. वंशावळी जोडपाक तालुको पांवड्याचेर समिती स्थापन करतले.
३. राज्यभरांतल्या मराठा आंदोलकां वयले गुन्यांव फाटल्यान घेतले.
४. शिक्षणांत ओबीसी प्रमाण सगल्यो सवलती.
५. मराठा आरक्षणाचेर फुडल्या अधिवेशानंत चर्चा करतले.
६. जात प्रमाणपत्र दिवप्यांचो अहवाल दितले.
७. मराठवाड्यांतल्यो जातीच्यो नोंदी सोदपाक शिंदे समितीक मुजतवाड.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
