भांगरभूंय | प्रतिनिधी
खबरां संस्था
नवी दिल्ली : केरळांतल्या मल्याळी न्यूज पोर्टलाचे पत्रकार सिद्दीकी कप्पन हांकां सर्वोच्च न्यायालयान जामीन मंजूर केला. 5 ऑक्टोबर 2020 दिसा हाथरस घडणुकेची (दलीत चलयेचेर बलात्कार) बातमी घेवपाक थंय वतना ताका वाटेर युएपीए कायद्या खाला अटक केल्ली. अखेरेक 9 सप्टेंबराक सरन्यायाधीश यु. लळीत हांच्या खंडपीठान तांकां जामीन दिलो. दरेकल्याक अभिव्यक्ती स्वातंत्र्य आसा, अशें न्यायालयान म्हणलां.
सिद्दीकी कप्पन हांच्या जामीन अर्जाचेर शुक्रारा सरन्यायाधीश यू यू लळित, न्यायमूर्ती एस रवींद्र भट्ट आनी न्यायमूर्ती पी एस नरसिंम्हा हांच्या खंडपीठा सामकार सुनावणी जाली. ह्या वेळार उत्तर प्रदेश सरकारान कप्पन हांच्या जामिनाक खर विरोध केलो. कप्पन हांचे ‘पॉप्युलर फ्रंट ऑफ इंडिया’ (पीएफआय) हे आतंकवादी संघटने कडेन लागींचे संबंद आशिल्ल्याचें उत्तर प्रदेश सरकारा वतीन खंडपीठाक सांगलें. सिद्दीकी हे देशांत धार्मिक दुस्वास पातळावपाच्या कटांत वांटेकार आसात, असो युक्तीवादूय सरकारा वतीन जालो. मात, सर्वोच्च न्यायालयान सरकाराच्या युक्तीवादाचेर प्रस्नचिन्न उपस्थित करीत आरोपी विशीं एकूय पुरावो ना, अशें सांगीत कप्पन हांकां जामीन मंजूर केलो.
14 सप्टेंबर 2020 दिसा उत्तर प्रदेशांतल्या हाथरस गांवांत एके 19 वर्सांचे दलीत चलयेचेर चवगांनी सामूहीक बलात्कार केल्लो. आरोपी उच्च वर्णीय ठाकूर समाजांतले आसले. हे चलयेक 15 दिसांनी मरण आयलें. तिचे कुडीचेर पुलिसांनी घरच्यांची संमती घेनासतना हाॅस्पिटलांतल्यान भायले भायर मसुंडेत व्हरून निमणे संस्कार केले, असो आरोप जाल्लो. हे घडणुकेची बातमी हाडपाक कप्पन हाथरसात गेल्ले. तेन्ना तांकां वाटेरूच पुलिसांनी अटक केल्ली.
सिद्दीकी कप्पन हे मल्याळम न्यूज पोर्टल अझिमुखमचे बातमीदार. ते केरळ युनियन ऑफ वर्किंग जर्नलिस्टच्या दिल्ली युनिटाचे सचिव. पत्रकारिता करचे पयलीं ते आपल्या गांवांत, वेंगारा हांगां शिक्षक आशिल्ले. मागीर णव वर्सां सावदी अरेबियाक संगणक तज्ञ म्हूण काम केलें. 2011 त बापायच्या मरणाक लागून केरळांत आयले आनी पत्रकारितेक सुरवात केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
