भांगरभूंय | प्रतिनिधी
पायलट ही खास गोंयची संकल्पना. देशांत हेर कडेन हालीं – हालीं मेरेन पायलट पळोवपाक मेळनाशिल्ले. पायलट म्हणल्यार विमानाचो न्हय, तर मोटारसायकलीचो. हे येरादारी मळा वयले सगल्यांत प्रामाणीक वेवसायीक. तांचे आड सहसा गुन्यांव नोंद जाल्लो आयकूंक येवचो ना. गोंय हें पर्यटन राज्य. फाटल्या कांय वर्सांनी पर्यटक भाड्याची मोटार वा दुचाकी घेवन भोंवतात. वांगडा तांची मोगी वा घरकान्न आसता. ही सुविधा तांकां दिवपी बरेच वेवसायीक आतां गोंयांत तयार जाल्यात. तातूंतल्या कांय जाणां कडेन खंय 25 -25 दुचाकी आसात! हीच ती रेंट अ बायक. अशीच रेंट अ कार वा कॅब सेवाय आसा. तांचे पसून स्फूर्त घेवन कोंकण रेल्वे म्हामंडळानूय स्वताची रेंट अ बायक सेवा सुरू करपाचें जाहीर केल्लें. निविदाय काडिल्ली. मात आतां राज्य सरकाराच्या सांगण्या वयल्यान तांणी ती रद्द करपाचो निर्णय घेतला.
कोंकण रेल्वेन एकाच कंत्राटदारा वरवीं आपल्या सात स्टेशनांचेर रेंट अ बायक सुरू करपाक निविदा जारी केल्ली. थिवी, करमळी, मडगांव, काणकोण, कारवार, गोकर्ण रस्तो आनी कुमठा हीं तीं स्टेशनां. हे निविदेक दुचाकी वेवसायिकां वांगडाच सगल्या राजकी पक्षांनी विरोध केलो. तांच्या मतान, गाडयो भाड्यान दिवपी वेवसायिकांक आतां पयलीं सारकें गिरायक मेळना. तातूंत हे चडशे वेवसायीक गोंयकार. फक्त रेंट अ बायकूच न्हय, तर स्टेशनांचेर हेर गोंयकार मोटारसायकल पायलट, टॅक्सीकारूय भाडीं मारतात. तांच्या वेवसायाक कोंकण रेल्वेच्या निर्णयाक लागून मार बसपाचो. हो वेवसाय करपी शेंकड्यांनी गोंयकार आसात. ते सगले स्वताच्या पांयांचेर उबे आसात. म्हणटकच तांकां उर्बा दिवपाची गरज आसा. ते बेकार जाल्यार ताचो परिणाम गोंयचे अर्थवेवस्थेचेर जातलो. राज्यांतल्या बेकार तरणाट्यांचे संख्येंत वाड जातली. म्हणटकच सरकारान चोंय वटेन चिंतून कोंकण रेल्वे म्हामंडळाक ही निविदा रद्द करपाक लायली.
रेंट अ बायक जावं वा रेंट अ कार वा हेर मोटारी…. सगल्यांनी आपले आड कसलेच आरोप जावचे नात, हाची जापसालदारकी घेवपाची गरज आसा. फाटीं गोंयांत अपघात जाल्ले, तातूंत दोगां- तिगांक मरण आयिल्लें. ते सगले अपघात रेंट अ बायकाचे आशिल्ले. त्या वेळार रेंट अ बायक सेवेचेर खर निर्बंध घालपाची मागणी जायत्या गोंयकारांनी उक्तायिल्ली. पूण, उपरांत दीस उलगले तशीं हीं प्रकरणां न्हिवलीं. रेल्वे स्टेशनांचेर जायते येरादारी वेवसायीक वेवसाय करतात. बऱ्योच रेलगाडयो रातच्यो येतात. तेन्ना भौशीक येरादारी बंद आसता. म्हणटकच प्रवासी ह्या दुचाकी, मोटारींनी वतात. त्या वेळार ते तोंडाक येता तें भाडें घेतात, असो दावो प्रवासी करतात. विमानाचे तिकेटी परस मडगांवच्यान थिवी येवपाक चड भाडें, असो आरोप कांय म्हयन्यां पयलीं जाल्लो. रातचेंच न्हय, तर दिसाचेंय चड भाडें घेवपी आसात…. आनी ते फक्त रेल्वे स्टेशनाचेरूच न्हय, तर विमानतळ, बाजार आनी हेर कडेनूय. पणजे सारक्या शारांत कांय म्हयन्यां पयलीं देडशीं रुपया आशिल्लें भाडें आतां दोनशे रुपयांचेर पावलां. अर्थांत भाड्याचे गाडयेन प्रवास करपी परवडटा म्हूण प्रवास करतात, म्हणटकच तांकां वाडिल्ले पन्नास रुपया फारीक करपाक व्हडलेंशें कांय दिसना. पूण, म्हारगायेच्या नांवार अशी भाडेवाड करप कितली योग्य? ते खातीर येरादारी खात्यान परवानगी दिल्या? थोडे कडेन कोणूय स्वताची गाडी घेवन आपल्या सोयऱ्याक वा घरच्याक हाडपाक विमानतळ वा स्टेशनाचेर गेलो जाल्यार ताचे कडेन वाद घालपी वेवसायीक आसात. दुसरे कडलो वेवसायीक ल्हवूच भाडें घेवन वचपाचेय प्रकार कांय विमानतळाचेर घडटात. फाटीं मोपा विमानतळाचेर थळाव्या टॅक्सीकारांनी एकल्याक धरिल्लो. रेंट अ बायक भाड्यान दिवप्यांनी आतां पर्यटकांक गोंयांतले कायदे, नेम सांगपाक जाय. फाटल्या कांय दिसांनी घडिल्ल्या अपघातां उपरांत तांणी तें सांगलांच आसतलें. आयज पसून दुचाकी घेवन पर्यटक ती मनाक येता तशी धोफरायतात. दर्यावेळांचेर रेंवेंत ती चलयतात. उदकांत पसून व्हरतात. मोटारींत दार उक्तें करून उबे रावन शुटींग करपीय देडशाणे आसात. तशें करप्यांक पुलिसांनी भितर उडोवपाक जाय. तातूंत कांय दुचाकींच्यो नंबरप्लेटी काळ्यो, हळडुव्यो नासतात. येरादारी खात्याक ताचेरूय नियंत्रण दवरचें पडटलें.
कोंकण रेल्वेन ही रेंट अ बायक सेवा सुरू करपाचें थारायिल्लें, ते प्रवाशाक स्टेशना वयल्यान दुचाकी घेवन थेट हाॅटेलांत वचपाक? काय आनीक खंयच्या उद्देशान? पूण, ह्या निर्णयाक लागून थळाव्या परंपरीक वेवसायिकांचेर कांय प्रमाणांत तरी परिणाम जावपाचोच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
