भांगरभूंय | प्रतिनिधी
अखेरेक कला आनी संस्कृती मंत्री गोविंद गावडे हांच्या हातांत गोंय सरकारान ‘नाल्ल’ दिलो. तांकां मंत्रीमंडळांतल्यान काडिल्ल्याचो लेखी आदेश सांजवेळा राज्यपाल श्रीधरन पिल्लई हांणी काडला. फाटल्या कांय दिसां सावन हें राजकी नाट्य चलतालें. उपरांत सगलें किरांव (थंड) जाल्लें. पूण क्रांतीदिसाच्या म्हुर्तार गावडे हांकां काडपाचो आदेश भायर सरलो. राजकी मळार हें अशें जातलें कांय ना, हाचो जायत्या जाणांक दुबाव आशिल्लो. कारण समाज संघटणा आक्रमक जावपाक शकता, अशें तांकां दिसतालें. गावडे हांचे फाटल्यान गावडा, कुणबी, वेळीप समाजाचे वावुरपी आसात. तें नेमकें कितें पावल उखलतात तें फुडल्या 2- 4 दिसांनी कळटलें. मंत्रीमंडळांत आनिकूय बदल जावं येतात. राज्यांत पक्ष वाडपा खातीर फुडल्या बुधवारा मेरेन आनिकूय व्हडले निर्णय जावपाचे आसात, अशें भाजपा प्रदेशाध्यक्षान म्हणलां.
हालींच कांय मंत्री, आमदारांच्यो दिल्ली वारी वाडिल्ल्यो. ताका लागून कोण तरी कदेला वयल्यान देंवतलो वा कदेलाची अदलाबदल जातली, हाची सुलूस राजकारण मोगींक लागिल्ली. आतां गोविंद गावडे हांच्या जाग्यार सभापती रमेश तवडकार हांची निवड जातली काय हेर कोणाची तें कळटलेंच. आनिकूय एका मंत्र्याक कदेला वयल्यान देंवोवपाची शक्यताय आसा. तर कांय आमदार भाजपांत प्रवेश करपाचे आसात, असो जाणकारांचो अदमास. बऱ्याच गोंयकारांची ह्या घडामोडींचेर नदर आसतली. गावडे हांकां पदा वयल्यान काडपाचीं खूब कारणां आसतलीं. मुख्यमंत्र्यां कडेन आशिल्ल्या आदिवासी कल्याण खात्याच्या कारभाराचेर तांणी खर टिका केल्ली. थंय फायली पास करपाक पयशे घेतात, असो आरोप केल्लो. समाज मेळाव्यांतलो हो व्हिडियो व्हायरल जातकच खवदळ पडिल्लो. सरकारांतलो मंत्रीच सरकाराचेर टिका करता, हाची गंभीर दखल पक्षान घेतिल्ली. (गावडे हांच्या वक्तव्याक लोकांचो तेंकोय आशिल्लो. भ्रश्टाचार उक्तडार हाडपांत कांयच चूक ना, अशें तांणी म्हणिल्लें.) गावडे हांचेर पयलीं भ्रश्टाचाराचे आरोप जाल्ले. सांस्कृतीक कार्यावळी खातीर मंजूर केल्ल्या 26.85 लाख रुपयांचो गैरवापर केल्ल्याचो गंभीर आरोप खुद्द सभापती रमेश तवडकार हांणी केल्लो. कार्यावळी जायनासना निधी दिला, तेन्ना ह्या प्रकरणाची चवकशी करची, अशी मागणी तांणी केल्ली. कला अकादमीचे दुर्दशेचो थपकोय आमदार गावडे हांचेर बसलो. गळपी तेर्रास, उजवाड- आवाज येवजण सारकी ना, एसी बंद पडप, असले प्रकार घडले. अकादमीचें पांखेंय पडलें. अशें केन्ना जावंक नाशिल्लें. ह्या कामाचेर 50 कोटीं परस चड दुडू खर्च करूनय दर्जो इतलो बाबत कित्याक अशी टिका जाल्ली. अजून हें प्रकरण पुराय सुटावें जावंक ना. भाजपांतले कांय गट गावडे हांच्या वक्तव्याचेर बेजार आशिल्ले. हेंय अंतर्गत चेपण पक्षश्रेश्ठींचेर आशिल्लें. आदिवासी संघटणांच्या एका गटान गावडे हांकां समर्थन दिल्लें, तर दुसऱ्यान विरोधांत. आमदार गावडे हांच्या आरोपांची चवकशी करून दोशी अधिकाऱ्यांचेर कारवाय करची, अशी मागणी करून ‘उटा’न तांकां जाहीर समर्थन दिल्लें. आतां ह्या निर्णया उपरांत तांची प्रतिक्रिया कितें ती कळटली. आपल्याक विस्वासांत घेनासतना मतदारसंघांत सरकारी कार्यावळ आयोजीत करतात, म्हूण खात्याच्या संचालकाक तापयतनाचो आमदार गावडे हांचो आॅडियो गाजिल्लो. तातूंत ‘कापून काडटलों’ हो ‘डायलाॅग’ तर बरोच लोकप्रीय जाल्लो. असल्या खूब गजाली, आरोप, प्रत्यारोपा उपरांत आतां हो तांकां मंत्रीमंडळांतल्या काडपाचो निर्णय जालो.
मंत्रीपद वचप ही सादी गजाल न्हय. कारण ‘जनतेचें कल्याण’ करपाक मंत्रीपद हें जायच आसता खंय. सरकाराच्या ह्या निर्णया उपरांत पत्रकारां मुखार उलयतना गावडे हांकां धक्को बशिल्ल्याचें दिसले बगर रावलें ना. वरभर उपरांत तांची प्रतिक्रिया आयल्या. ‘गोंय क्रांतीदिसा म्हज्या वाट्याक हें आयलें. कारण हांव गरीब लोकांचे वटेन उबों रावलों. हांवें आवाज उठयिल्लो तें आंदोलन चालूच दवरपाक म्हाका मुक्त केल्ले खातीर म्हज्या सरकाराक आनी पक्षाक दिनवास.’ आतां ते समाजाच्या हिता खातीर भ्रश्टाचार विरोधी आंदोलन सुरू करतले, काय भाजपा आड उबे रावतले, तें दिसतलेंच. हो निर्णय मुख्यमंत्री सावंत आनी पक्षान समन्वयान घेतला. आमकां कोणाची इश्टागत नाका आनी दुस्मानकायूय नाका, अशी प्रतिक्रिया प्रदेशाध्यक्षान दिल्या.
सरकाराच्या ह्या निर्णयाक लागून राजकी संघर्श वाडटलो. 19 नोव्हेंबर 2023 दिसा भौशीक बांदकाम मंत्री निलेश काब्राल मंत्रीमंडळांतल्यान भायर सरिल्ले. आपूण त्याग करतां, अशें तांणी तेन्ना म्हणिल्लें. उपरांत आलेक्स सिक्वेरा मंत्री जाल्ले. आतां आमदार गावडे उपरांत आनीक फेरबदल जाले जाल्यार त्या जाग्यार रेजिनाल्ड, दिगंबर कामत हांकां सॉर्त लागूं येता. पूण ‘देवा’च्या मनांत कितें आसा तें सामान्य मनशाक कशें कळटलें?
गोविंद गावडे हांकां काडले उपरांत आतां तांचेर जाल्ल्या आरोपांची घडये चवकशी जावं येता. तांणी केल्ल्या भ्रश्टाचाराच्या आरोपांक लागून सरकाराचे प्रतिमेचेर खत पडलां. स्वता आमदार गावडे फायली पास जावपाचे घडणुकांचे पुरावे दिवंक शकतात. हें सगलें करतना अनुसुचीत जमातीचो भौस दुखावचो ना, हाचीय जनताय सरकारान घेवची पडटली. कालचें आमदार गावडे हांचें वक्तव्य पळयल्यार ते बंडखोरीच्या मुडांत आशिल्ल्याचें जाणवता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
