भांगरभूंय | प्रतिनिधी
मेलबोर्न , खबरां संस्था ः स्वताच्याच 4 भुरग्यांच्या खून प्रकरणांत 20 वर्सां बंदखणींत रावपी ऑस्ट्रेलियन बायलेक बिरेस्तारा न्यायालयान निर्दोश थारायली. हे बायलेचें नांव कॅथलीन फोल्बिग आनी ती दोन दशकां सावन आपली निरपराधीपण सिद्ध करपा खातीर झगडटाली.
कॅथलीनान 1989 ते 1999 ह्या काळांत केलब, पॅट्रिक, सारा आनी लॉरा ह्या चार भुरग्यांची हत्या केली अशें म्हणटात. हत्येच्या वेळार भुरग्यांची पिराय 19 दिसां सावन ते 18 म्हयने आशिल्ली. चारूय भुरग्यांचो गळो दाबून तांका मारिल्ल्याचो आरोप तिचेर आशिल्लो.
तिचे आड आशिल्लो गुन्यांव फाटीं घेतले उपरांत 56 वर्सां पिरायेच्या कॅथलीनान सांगलें, “हांवें म्हज्या भुरग्यांक मारूंक ना.” परत परत सांगून लेगीत तपास यंत्रणेन म्हजेर विस्वास दवरलो ना. म्हाका दोशी थारावन ते खोशी जाले.
पूण नव्या तपास यंत्रणेक लागून म्हजे निरपराधीपण सिद्ध जाले म्हूण म्हाका खोस जाता.
ह्या हत्येच्या प्रकरणा उपरांत ‘ऑस्ट्रेलियाची सगळ्यांत वायट आवय’ म्हणून तिका वळखताले. 2003 वर्सा न्यायालयान तिका 40 वर्सां बंदखणीची ख्यास्त फर्मायली, उपरांत ती 30 वर्सां मेरेन उणी केली.
फाटलीं 20 वर्सां ती आपूण निरपराधी आसा अशें सांगून झगडटाली. अखेरेक न्यायालयान तिचेर हत्या करपाचो आरोप करपी पुरावे विस्वासांत घेवपा सारके नात म्हणून तिचो खटलो न्हयकारलो आनी तिका निरपराधी थारायली. तिचे वकील आतां लुकसाण भरपाय मेळोवपाचो यत्न करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
