भांगरभूंय | प्रतिनिधी
माडिकेरी, खबरां संस्था : कर्नाटकांत एके घडणुकेक धक्को दिवपी वळण मेळ्ळां. आपले बायलेचो खून केल्ल्यान सुमार दोन वर्सां बंदखणींत आशिल्लो घोव निरपराधी सिद्ध जाला. कारण बायल जिवी आनी बरी ठणठणींत आसा. माडिकेरींतल्या एका हाॅटेलांत भुस मारतना ती सांपडली.
कोडागु जिल्ह्यांतल्या बसवनहळ्ळींत रावपी सुरेश ह्या तरणाट्यान 2021 वर्सा ताची बायल मल्लीगे बेपत्ता जाल्ल्याची कागाळ केल्ली.
एक वर्सा उपरांत शेजराच्या म्हैसूरू जिल्ह्यांतल्या बेट्टाडापुरा पुलीस स्टेशनाचे हद्दींत हाडांचो सांगाडो मेळ्ळो. आनीक कसलोच पुरावो नाशिल्ल्यान पुलिसांक तो मल्लीगेचो सांगाडो असो दुबाव आयलो. डीएनए जुळोवणी करीनासतना तांणी सुरेश आनी ताची माय गौरी हांकां पुलिसांनी जबरदस्तीन अवशेश मल्लीगेचे अशें सांगपाक लायलें, असो आरोप आसा. उपरांत सुरेशाक अटक करून बायलेच्या खून प्रकरणांत आरोपी केलो.
सुमार दोन वर्सां तो बंदखणींत रावलो. न्यायालयाच्या आदेशा प्रमाण डीएनए चांचणेंत हे अवशेश मल्लीगेचे न्हय हें सिद्ध जाले उपरांतच सुरेशाक जामीन मेळ्ळो आनी ताची सुटका जाली.
पूण, खरें मोडण पयर आयतारा आयलें, जेन्ना सुरेशाच्या इश्टांक मल्लीगे दिसली. जिवी, ठणठणीत. माडीकेरीच्या रेस्टॉरंटांत बसून ती भुस मारताली. ह्या इश्टांनी तिचेर नदर दवरली. पुलिसांक आपयले आनी तिका ताब्यांत घेतली. बेट्टादापुरा पुलिसांनी तिका म्हैसूरू न्यायालयांत हाडली.
हे घडणुकेक लागून पुलिसांची चवकशी पद्दती विशीं गंभीर प्रस्न उप्रासल्यात आनी केशी विशीं आडनदर जाल्या काय मुद्दाम सगलें हें घडोवन हाडलां, तें कळना. दुबळ्या पुराव्यां वयल्यान आनी कुड वळखूंक अपेस आयिल्ल्यान एका निरपराधी मनशाक बंदखणींत घालोच कसो तें स्पश्ट करपाचो चेंपण आतां पुलीस प्रशासनाचेर आयलां.
तीं तीन वर्सां खंय आशिल्ली, हें सगलें प्रकरण तिका खबर आशिल्लें काय नाशिल्लें, ताचीय चवकशी पुलीस करतात. आतां मात ते चूक करचे नात, अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
