भांगरभूंय | प्रतिनिधी
कोच्ची : अखील भारतीय कोंकणी परिशदेन आयोजीत केल्लें 26वें अखील भारतीय कोंकणी साहित्य संमेलन 22 आनी 23 नोव्हेंबराक ए. जे. हॉल, कल्लूर, एर्नाकुलम हांगा जातलें. भारताच्या विंगड विंगड वाठारांतल्यान सुमार 700 प्रतिनिधी ह्या साहित्य संमेलनांत वांटो घेवपाचे आसात.
कोंकणी साहित्याक योगदान दिल्ल्या व्यक्तींच्या वावराक आदर दिवपाक आनी याद काडपाक संमेलनाचे सुवातेक ‘अशोक भोंसलो नगर’, माचयेक ‘अनंत भट माची’ अशीं नांवां दिल्यांत. प्रवेशदाराक ‘अनंत नारायण दरवटो’ अशें आनी पुस्तक प्रदर्शनाचे सुवातेक सुशीला भट आनी शिवानंद शणै अशीं नांवां दिल्यांत. हाचे भायर पी. जी. कामत, मारियो मिरांडा आनी व्ही. जे. पी. साल्ढाणा हांची जल्मशती मनयतात देखून परिशदेन तयार केल्ल्या खाशेल्या यादस्तिकांचेर तांचीं नांवां छापून येतलीं.
परिशदेचें उक्तावण 22 तारखेक सकाळीं 10 वरांचेर नामनेचे लेखक आनी सरस्वती सम्मान पुरस्कारान सन्मानीत प्रभा वर्मा करतले. संमेलनाचें अध्यक्षपद नामनेचे कोंकणी लेखक माधव बोरकार सांबाळटले. राजभाशा संचालनालयाचे उपसंचालक अनील सावंत मानाचे सोयरे म्हूण हाजीर रावतले.
23 तारखेक दनपारां 3.30 वरांचेर जावपी समारोप सुवाळ्याक केरळ उच्च न्यायालयाचे न्यायाधीश नागरेश मुखेल सोयरे आसतले. नामनेचे कन्नड लेखक जयंत कैकिणी मानाचे सोयरे म्हूण हाजीर आसतले. दोन दिसांच्या परिशदेंत कोंकणी साहित्याच्या वेगवेगळ्या आंगांचो आस्पाव आशिल्लीं स सत्रां घडून येतलीं. कोंकणी साहित्यांत उल्लेखनीय योगदान दिवपी मानेस्त लेखक ह्या सत्रांनी वांटो घेतले.
नव्यान उजवाडाक येवपी कोंकणी साहित्यकृतींचें विमोचन उक्तावण सुवाळ्यांत वेळार जातलें. संमेलन स्थळार पुस्तक प्रदर्शन आनी विक्री जातली. 22 तारखेच्या सांजवेळार केरळ आनी गोंयच्या कलाकारांनी सादर केल्ली सांस्कृतीक कार्यावळ जातली.
संमेलनाच्या कार्यावळीचो एक भाग म्हूण गोंयांतल्यान येवपी सुमार 300 प्रतिनिधींक कोचीच्या दायजाची आनी संस्कृतायेची वळख करून दिवपा खातीर ‘कोची दर्शन’ नांवाची खाशेली प्रवास भोंवडी आयोजीत केल्या. कोंकणी अन्न महोत्सव आनी हेर सांस्कृतीक कार्यावळी लेगीत आयोजीत केल्यात.
टी. आर. सदानंद भट येवकार अध्यक्ष, आनंद जी. कामत कार्याध्यक्ष म्हणून जाल्यार आनी टी. सरथ कुमार हांकां हाचे आदींच सरचिटणीस म्हूण वेंचून काडल्यात. केरळ कोंकणी साहित्य अकादेमीचे वांगडी सचीव डी. डी. नवीन कुमार, केंद्रीय कोंकणी साहित्य अकादेमी पुरस्कार विजेते आर. एस. भास्कर, ॲड. डी. जी. सुरेश, मदन शणै, पी. जी. आर. कामत, बी. माधव पै, एस. रामकृष्ण किणी, शोभा हरिदास, पी. एन. कृष्णन, कृष्ण कुमार, रमादेवी आनी बी. एस. शणै हे संमेलनाच्या वेगवेगळ्या सत्रांचे समन्वयक म्हूण जापसालदारकी सांबाळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
