भांगरभूंय | प्रतिनिधी
पणजी: अखिल भारतीय कोंकणी परिशदेचें २६ वें अखिल भारतीय साहित्य संमेलन अंदूं २२ आनी २३ नोव्हेंबराक केरळ राज्यांतल्या एर्नाकुलम शारांत घडून येवपाचें आसा.
परिशदेचें आयोजन करपाची जापसालदारकी केरळांतल्या कोंकणी संस्थांनी संयुक्तपणान घेतल्या. परिशदेक हाजीर रावपाक सोदपी विद्यार्थी प्रतिनिधीं खातीर फकत १०० रुपया शुल्क आसतलें. तांच्या दोन दिसांच्या राबित्याची आनी जेवणाची वेवस्था आयोजक करतले. हाचे भायर हेर प्रतिनिधीं खातीर तीन प्रकार तयार केल्यात. ज्या लोकांक राबित्याची गरज ना तांकां ५०० रुपया, राबित्याची सामान्य वेवस्था उपकरतल्यां खातीर १००० रुपया आनी राबित्याची विशेश वेवस्था जाय आशिल्ल्यांनी दोन दिसां खातीर ३५०० रुपया शुल्क आकारतले. ह्या शुल्कांत प्रतिनिधीं खातीर जेवण आनी नाश्तो हांचोय आस्पाव जातलो.
गोंयच्यान एर्नाकुलम (जंक्शन आनी टावन) मेरेन जायत्यो रेल्वे गाडयो उपलब्ध आसात. अखिल भारतीय कोंकणी परिशदेन इत्सूक प्रतिनिधींक बेगीन तिकीट आरक्षीत करपाचें आवाहन केलां.
परिशदेक हाजीर रावपाची इत्सा आशिल्ल्या प्रतिनिधींक शुक्रारा २१ नोव्हेंबराक सकाळीं एर्नाकुलम पावपाची विनंती आयोजकांनी केल्या. त्या दिसा प्रतिनिधींच्या खर्चान कोची शारांतल्या मुखेल थळांक भेट दिवपाची वेवस्था आयोजकांनी केल्या.
परिशदेक हाजीर रावपाची इत्सा आशिल्ल्यांनी सकयल दिल्ली गूगल लिंक भरून ते प्रमाण कळीत करपाचें आवाहन आयोजकांनी केलां.
अदीक म्हायती खातीर परिशदेचो कार्याध्यक्ष चेतन आचार्य हाका ८८३०१०३७६८/९४२२३८९२९० वा कार्यदर्शी स्नेहा सबनीस ९९२३६३३७८९ हांकां संपर्क करचो अशें कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
