भांगरभूंय | प्रतिनिधी
पणजी: छ. शिवाजी महाराजांच्या शौर्या विशीं जागृताय निर्माण करपा खातीर अखिल गोमंतक शिवमोगी संघटानान गोंयांत किल्लो बांदपाची सर्त घडोवन हाडल्या. जेतिवंतांक 5 ते 50 हजार रुपया मेरेन इनामां दितले. सर्ती खातीर नोंदणी करपाची निमाणी तारीख 15 ऑक्टोबर आसा.
संघटनेचे पदाधिकारी सत्यविजय नायक हांणी पणजेंत जाल्ले पत्रकार परिशदेंत म्हायती दिली. ह्या वेळार मनोज गांवकार, संकेत आर्सेकार, राजेंद्र देसाय, सुजय देसाय आनी हेर पदाधिकारी हाजीर आशिल्ले.
सर्ती खातीर नोंदणी ऑनलायन करची पडटली. नोंदणीची लिंक रोखडीच दितले. ही सर्त वैयक्तीक आनी पंगड विभागांत जातली. वैयक्तीक खातीर 1 चौखण मिटर वाठारांत किल्लो बांदचो पडटलो. हाचे खातीर दरेका तालुक्यांत पयल्या क्रमांकाचेर 5 हजार रुपया, दुसऱ्या क्रमांकाचेर 4 हजार रुपया आनी तिसऱ्या सुवातेर 3 हजार रुपया इनाम दितले. तशेंच उमेद वाडोवपी धा जाणांक दरेकी 2 हजार रुपया इनाम दितले अशी म्हायती नायक हांणी दिली.
पंगड वर्गांत 4 चौखण मिटर वाठारांत किल्लो बांदचो पडटलो. ते खातीर दरेकी जिल्ह्यांत पयलें इनाम 50 हजार रुपया, दुसरें 30 हजार रुपया आनी तिसरें 20 हजार रुपया दितले. धा पंगडांक उमेद वाडोवपी दरेकी 5 हजार रुपया इनाम दितले. दोनूय पंगडांनी 20 ऑक्टोबर मेरेन किल्लो बांदप गरजेचें. किल्लो बांदले उपरांत ताची म्हायती, फोटो आनी 30 सेकंदांचो व्हिडियो आयोजकांक धाडचो पडटलो. सर्ती खातीर वैयक्तीक वर्गा खातीर नोंदणी शुल्क 50 रुपया आनी संगीत वर्गा खातीर 100 रुपया आसा.
फकत पर्यावरणाक अनुकूल वस्तूंचो वापर
किल्ले बांदपा खातीर फकत पर्यावरणाक अनुकूल साहित्याचो वापर करचो अशें नायक हांणी सांगलें. किल्ल्यांत थर्मोकोल, फायबर सारकिल्ले कृत्रीम वस्तू वापरूंक मेळनात. हाची खात्री केले उपरांत सर्ती खातीर निमाणे किल्ले वेंचून काडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
