भांगरभूंय | प्रतिनिधी
ढवळीकारः धरणां, घसघशाचेर सोलर, हायड्रोपॉवरा वरवीं वीज
भांगरभूंय । प्रतिनिधी
पणजीः गोंयांत अक्षय उर्जा तयार जावची हे खातीर गोंय सरकार खूबशे उपक्रम हातांत घेवपाचें आसा. ताचोच एक भाग म्हूण गोंयच्या चार धरणांनी उफेवपी सोलर पॅनल येतले जाल्यार तीन धरण आनी एका घसघशाचेर हायड्रोपॉवर प्लांट घालपाची येवजण आसा. विधानसभेंत दिल्ले लेखी जापेंत अक्षय उर्जा मंत्री सुदिन ढवळीकार हांणी ही म्हायती दिली.
सतलज जल विद्यूत निगम लिमिटेड गोंयच्या आमठाणे, चापोली, अंजूणें आनी साळवले उफेवपी सोलर पॉवर प्लांट बसयतले. 197 मॅगा वॅट वीज तयार करपाची तांक ह्या प्लांटाची आसतली. सरकारान सतलज जल विद्यूत निगम लिमिटेडा वांगडा एमओयू केला. ते प्रमाण सतजल जल निगम लिमिटेडान सुवातेचें सर्वेक्षण तयार करून डीपीआर सादर केला. तोशिबा प्लांट सिस्टीम आनी सर्विसीस कोर्प हांचे वांगडा गोंयचीं धरणां आनी सेगीत कोसळपी घसघश्यांचेर वीज निर्मिती करपा खातीर हायड्रो पॉवर प्लांट बसोवपाक मेळटा काय ना हाचो अभ्यास केला. अभ्यासा उपरांत दिसून आयलां, गावणें धरण, म्हैसाळ धरण, चापोली धरण, अंजुणें धरण आनी हरवळें घसघशार चडांत चड 15 मॅगा वॅट तांकीचो प्लांट बसोवपाक मेळटा, अशें ढवळीकार हांणी म्हणलां.
वायू उर्जे खातीर राष्ट्रीय संस्थेन सोलरांचो खोलायेन अभ्यास केला आनी रेडियशन पॅटर्न सोदल्यात. हे सुवातेर सोलर पॉवर प्लांट बसोवपाक मेळटले. 3- मॅगा वॅट तांकीच्या पांख्यार बसोवपाचे सोलर पॉवर प्लांट आनी सरकारी तशेंच खाजगी जमनीर 300 मॅगा वॅट तांकीचे सोलर पॉवर प्लांट बसोवपाक डीपीआर तयार करपा खातीर डोर्नियर ग्रूप हांकां सल्लागार नेमला, अशी म्हायती ढवळीकार हांणी दिल्या. वायू उर्जे खातीर राष्ट्रीय संस्था हांचे वांगडा गेडान लोलयें, बेतूल, शिरगांव आनी पेडणेंच्या वाठारांचे वायू उर्जे खातीर विश्लेशण केलां. ह्या सुवातांचेर वाऱ्याचो नेट उणो आशिल्ल्यान उच्च तांकीच्या वाऱ्याचे टर्बायन बसोवप गोंयांत शक्य ना, अशें दिसून आयलां. 100 मॅगा वॅट वायू उर्जा निर्मिती करपा खातीर व्हर्टिकल एक्सीस टर्बायन बसोवपा खातीर गेडान प्रस्ताव मागयल्यात. ह्या प्रकल्पांचें डिझायन करप आनी बांदप, ते खातीर सुवात सोदप आनी वीज पुरवण सबस्टेशनांक पुरवण करप हें काम डॅव्हलपरांक करचें पडटलें, अशें ढवळीकार हांणी म्हणलां.
अक्षय उर्जे खातीर सरकारी येवजण्यो
– सरकारी इमारतींचेर 30 मॅगा वॅट सोलर प्लांट बसोवपा खातीर गेडा कडल्यान टेंडर जारी
– 35 मॅगा वॅट सोलर पॉवर प्लांट बसोवपा खातीर पीएम- कुसूम अ घटका खाला शेतकारांच्यो जमनी पळयल्यात.
– वीज खात्यांच्या सबस्टेशनांत 8 मॅगा वॅट सोलर पॉवर प्लांट बसोवपा खातीर पीएम- कुसूम क घटका खाला सुवात पळयल्या. – 50 मॅगा वॅट सोलर पॉवर प्लांट बसोवपा खातीर उसगांव संजिवनी सहकार साकर कारखान्यांत सुवात वेंचल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
