अक्षय्य तृतीया

भांगरभूंय | प्रतिनिधी

आयज 30 एप्रीलाक अक्षय्य तृतीया. ते निमतान….

केन्नाच सोंपना, जाचो शेवट जायना, हो अक्षय्य उतराचो अर्थ. ज्या गजालींक लागून मनशाची भरभराट जाता, मागीर तो वेव्हार, धंदो, उद्देगांत जावं, संवसार फुलता तो अक्षय्य.
अक्षय्य तृतीया ही वैशाख शुक्ल पक्षांतली तृतीया तिथी. ही साडेतीन म्हूर्तां मदली एक. तिचें खाशेलेपण म्हणल्यार ह्या विधीक केल्ल्या कसल्याय बऱ्या कामाचे पुण्य अक्षय्य मानतात. ते सत्कर्म केन्नाच सोंपना. अक्षय्य तृतीये दिसा पुण्याचें काम करप. गोरगरिबांक दानधर्म, जेवण, खाण दिवन परोपकार करप, कसलीय ङेट दिवप खरेंच बरें. सढळ हातान धन, पयसो दिवप, गरिबांक कपडे दिवप… हें केल्ल्यान मनशाक पुण्य मेळटा. ते खातीर प्रत्येक गोंयकारान आपल्याक शक्य आसा तितलें दान करपाक जाय.
अक्षय्य तृतीयेक आमच्या धर्मांत पवित्र स्थान आसा. ह्या दिसा हिंदू धर्मीय लोक मुद्दाम गाडी घेतात, नव्या बंगल्याचो घरप्रवेश करतात. दुकान सुरू करतात. ह्या दिसा खरेदी केल्ली संपत्ती केन्नाच नश्ट जायना, उणी जायना. हे तिथीक लग्न, साकरपुडो करपाची परंपरा आसा. नव्या दांपत्याचो संवसार सुखा,समाधानाचो जावचो, अनंतकाळ तिगून उरचो, तांचें नातें, एकमेकांचें
प्रेम अक्षय्य उरचें हो ताचे फाटलो हेतू जावन आसा.
अक्षय्य तृतीये विशीं पुराणांत खूब कथा आसात. श्रीकृष्णाक ताचो गरीब इश्ट फोवांची पोटली घेवन वता, तो दीस अक्षय्य तृतीयेचो. ते दिसा सावन सुदामाचें दळडीर सोंपलें. ताचे खोपीचें राजमहालांत रुपांतर जालें. तो गिरेस्त जालो. आमच्या पुर्वजां पसून चलत आयिल्ली ही परंपरा. ती आमचें जिवित सुखी करपाक मजत करता. अक्षय्य तृतीये दिसा सगल्यांनी भांगर, चांदी खरे करप शुभ मानतात. अशें केल्ल्यान आपल्या कुटुंबांत धनसंचय जावपाक मजत जाता. अडीअडचणीच्या वेळार ह्या भांगर, चांदीचो उपेग जाता.
भगवान विष्णूची आराधना करप बरें. ह्या दिसा लक्ष्मीमातेची पुजा, आरती केल्यार मनीस गिरेस्त जाता. आयचो दीस दान करपाक बरो दीस. विशेश म्हणल्यार अक्षय्य तृतीये दिसा केल्ल्या कामाचें बरें फळ रोखडेंच मेळटा.