भांगरभूंय | प्रतिनिधी
फाटल्या आठवड्यान हांव म्हज्या मावशेगेर अस्नोड्यां गेल्लें. दोन दीस मावशे वांगडा खबऱ्यो मारीत पासार करतलें म्हणत आईन दिल्ले आंबाडे, सावरबोणीं केळीं, आनी मावशेक आवडटा तसल्यो सोयेच्यो गोड वडयो घेवन हांव तांगेर पावलें. मावशी, मावसो तांचो चलो आनी सून आनी मावशेली नात – मिथिला सगल्यांची खबर घेतली आनी च्या पिवंक बसलें. सान मिथिला आतां दुसरेक शिकता ! च्या पितना तें म्हज्या म्हऱ्यांत आयलें. फाल्यांसावन म्हजी एक्झाम ! तूं म्हजो अभ्यास घे म्हणूंक लागलें. हांवेन विचारलें, “फाल्यां खंयचो पेपर ?” “फाल्यां मराठी !” तें सांगूक लागलें. “चल तर मराठीचें पुस्तक घेवन यो !” का किदेंय सांगप म्हळ्यारहांवेन म्हळें. “नाका पुस्तक नाका ! ह्या नोटबूकान बरयलां तेंच येतलें!” मिथिला म्हाकां सांगूक लागलें. “बरें आसा.. किदें किदें बरयलां चोपडेर ?” हांवेंन विचारलें !
“झोपडेर . ?” म्हणत मिथिला हांसूंक लागलें. “ताका कोंकणी उतरां समजूपाचीं ना ! सगळे कडेन इंग्लिश ! ‘सुतकांत तेरावो दीस !’ तांच्यो टीचरीय बीन धडाच्यो नात ! मराठींत विरुद्धार्थी तें चोपडेर ‘विरूदार्थी’ बरोवन दिल्लें. दिव्यान (मावशेली सून) पळयलें म्हूण बरें ! नाजाल्यार चूकींचेंच शिकपाचें !” मावशी सांगूक लागली. हांव तटास जालें. “आंकडे बरोवन दिल्या तें वाचून जाल्यार आंकडीच येवपाची !” म्हणत मावशी हासूंक लागली !
“चौवीस’, ‘अडूसष्ठ’, ‘शहायशीं’ अशेतरेन चूकीचें बरयल्लें !” मावशी सांगताली. “मागीर एकदीस दिव्या तिका वचून मेळ्ळें. म्हळ्यार ही आयकून घेवपाक तयार ना ! फकत तोंडाची बडबड ! ‘सोदतल्याक सांपडटा !’ म्हणत तिका सांगलें खंयचोय शब्दकोश पळोवन वा शुद्धलेखनाचें पुस्तक घेवन शिकय ! जाल्यार ही आयकूनच घेना. दिव्याक सांगलें तिका किदेंय सांगप म्हळ्यार ‘उमथ्या कळशार उदक !’ आपलें तेंच खरें म्हणटा ती ! कलयूग वेगळें न्हय ! ‘सोसो सोदता झाड आनी शेजारी सोदता पाड !’ म्हणटात ते तरेन दरेकलो आपल्या पुरतें सादोवन घेता. ही टीचर फकत पगारा खातीर शाळेंत येता. भुरग्यांचें तिका मात्तूय पडिल्लें ना.” मावशी पोटतिडकेन उलयताली. इतल्या बोवाळांत मिथिलालो अभ्यास थंयच उरलो. तें बेजारून कुडीन गेलें.
“आईले हात पांय फोडटाले आतां कशे आसात ?” मावशी म्हाकां विचारूंक लागली. “आयुर्वेदिक दोतोरान तेल दिलां तें लायतगीर बरें दिसता म्हणटाली ती.” हांवेन सांगलें. म्हणटा म्हणसर तीनसांज जाली. मावशेन देवा – तुळशी दिवो लायलो. उपरांत ती रातच्या जेवणाच्या तयारेक लागली. जेवणावेळार सान मिथिला चपाती नाका पोळे जाय म्हूण पिरंगुक लागिल्लें. “आतां खंयचे पोळे ? चपाती खा शाण्या !” म्हणत मावशी ताका समजायताली. इतल्यान
ताचो बाबा थंय आयलो. ताच्या
भयान मिथिला ओग्गी रावन
ताटांत वाडिल्ली चपाती खावंक लागलें. “पळयलें ? नाल्ला राग फातराकडेन घटना !” ल्हव आवाजांत उलयत मावशी हासूंक लागली.
मिथिला, ताचो बाबा आनी आज्ज्यालें जेवन जातगीर हांव मावशी आनी दिव्या वयनी जेवपाक बसलीं. जेवन जालें.तेबराबर वयनी दुसऱ्या दिसाच्या तयारेक लागली. हांव आनी मावशी
खबऱ्यो मारतालीं. “मावशे, वयल्या माळ्यार भाड्यान रावपी कमला काकी ना आतां ?” हांवेन विचारलें. “ना.तांच्या चल्यान नवो फ्लॅट घेतलो. टूर्स अॅन्ड ट्रेवल्साचो वेवसाय करता तो ! कमला काकी सदांच म्हणटाली, ‘अक्कल आशिल्ल्याक भांडवल नाका !’ पुतान तिगेलीं उतरां खरीं थारायलीं. शिर्वीस सोदत रावलो ना..! आतां वयर कोण्ण ना सद्या.
चवथ जातगीर पेन्ट बी करूंक जाय . मागीर कोण मेळटा जाल्यार पळोवया.” काकी सांगूक लागली. “फाटल्या दिसांनी दोगजाण भुरगे आयिल्ले. मात तांची म्हायती आयकल्यार कांयच पटपा सारकें नाशिल्लें. हांवेन हांकां म्हळें, ‘वाटेवयलें केस्तांव, शेळे आंगार फुगांव !’ नसती बिरमत नाका. तांकां जागो ना म्हूण सांगात. फामील मेळटा जाल्यारूच भाड्यान रावपा दिवप !”
“आई, फाटलेवटेन जाल्ले सुरण खणून काडूंक जाय. मावशेक दिवंक मेळटले.” वयनी मावशेक सांगताली. “हय गो .. बरी याद केली. मात म्हादूबाबाक सांगपाक नाका .. हांकांच सांगतां ! ‘उदकांतलो मांडूक उदक पिनासतना राबना !’ ताका काडूंक सांगल्यार तो अर्द्यापरस चड भाजी बी घेवन नाच्च जाता.” मावशी म्हणूंक लागली. म्हणसर घडयाळींत साडे णव वरां जांवन गेल्लीं. खबऱ्यो करतां करतां धा जायत
आयलीं. फाटलें दार लावन मावसो
वतालो ताका कवितांची बी खूब्ब आवड शीघ्रकवी म्हणल्यार अतिताय जायची ना.मुखारल्यान वतना तो मावशेक म्हणूंक लागलो,
“वदनि कवळि येता
नाम घ्या ईश्वराचे
परत परत का तू
गंध तेची उगाळे ?
बडबड करुनी का भाग्य
कोणा मिळाले ?
अचपळ मन आता आवरा आवरा
ते !”
वळी आयकून हांव आनी दिव्या वयनी न्हीदसर परतून परतून हांसतालीं.
अश्यो ह्यो म्हणींच्यो काणयो आनी काणयांनी रंगयाळी जाल्ली जीण ! ओंपारी आनी म्हणी आमकां जीण जगतना
भोव आदार दितात दर दिसा त्यो आमकां नव्या उमेदीन जगूंक शिकयतात. अश्यो आनीक काणयो म्हाकाय बरोवंक आवडटल्यो.
तन्मयी सहकारी
9021627993
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
