भांगरभूंय | प्रतिनिधी
कला अकादमीच्या ओपन एॅर थेटराचो स्लॅब कोसळ्ळो तें पळोवन मन सुन्न जालें. कांय खिणा खातीर भूतकाळांत पावलें. 1993 वर्सा म्हाका गोवा कला अकादमीच्या आंतरशालेय सर्तींत अभिनयाचो पुरस्कार मेळिल्लो. पयले फावट नांव पेपरांत आयिल्लें. ‘नितीन शिवराम नायक हाका मनीस आनी आनी मनिसपण ह्या नाटका खातीर उत्कृश्ट अभिनेतो म्हूण इनाम फावो जालां आनी नाटकाक पयलें इनाम मेळ्ळां.’ अशी ती बातमी आसली. इनामां सुवाळो पणजे कला अकादमींत आसलो. हांव गांवांतलो भुरगो. केन्नाच शार म्हणटात तें पळोवंक नासलें. इनाम घेवपाक राजधानी पणजी शारांत कशें वचप तें खबर नासलें. घरची अर्थीक परिस्थितीय तितली बरी नासली.
आमी रावतालीं त्या घरा कुशीक एक टायर पंक्चर काडपी रावतालो. तो म्हाका घेवन गेलो. तेन्ना हांव आठवेक आसलों. 13 वर्सांचो भुरगो. आमी बशीन पणजी पावले. कशे कशे गेले तें याद ना. फक्त आस आसली कला अकादमी कशी दिसता आनी हांव थंय केन्ना पावतलों ताची. अकादमी विशीं खूब कितें पेपरार वाचिल्लें, आयकल्लें. बस सामकी कला अकादमी लागसार उबी रावली. आमी देंवले. कितलेशे लोक, भुरगीं. गेटी कडे पावलों आनी दोळे भरुन आयले. कला अकादमी केन्ना पळयतलों आनी केन्ना थंय पावतलों हें सपनांत पसून चिंतूंक नासलें. वण्टी वयलें ‘कला अकादमी, गोवा’ हीं अक्षरां वाचलीं आनी दिसलें, हांव जणु सर्गांत पावलां. ते गोल गोल खांबे, सोपे, भीतर रंगयिल्लीं रंगयाळी चित्रां, कॅन्टीन, फाटलो भीष्मा सारको धवोफुल्ल दर्या, पाचवें चादरी सारकें गार्डन… जसो व्हडलो राजवाडोच. हांव दोळ्यांनी सगलें पियेत रावलों. मन भरून आयलें.
ब्लॅक बाॅक्सांत इनामां वितरण जालें. एसी फुल्ल आसली. दिसलें हांव काश्मीराकूच पावलां. एसी कशी थंडगार आसता, हें म्हाका त्या दिसा कळ्ळें. कार्यावळ सुरू जाली. कोण आसले, कितें उलयल्ले ते सारकें याद जायना. पूण जेन्ना म्हजें नांव घेतलें, ‘बेस्ट एक्टर नितीन नायक’ तेन्ना कानांत गुंजपाक लागल्यो, त्यो सगल्यांनी वाजयिल्ल्यो ताळयो. जणू काय हांवें सर्गाकूच हात लायला, अशें दिसलें. ती सर्टिफिकेट घेवन हांव जेन्ना भायर सरलों, तेन्ना खूब जाणांनी शाबासकी दिली. दोळे भरून आयले. मनांत म्हटलें ही कला अकादमी न्हय, तर ती नटरंगाची गर्भकूड
ताचे उपरांत हांव कला अकादमींत गेलां तेन्ना ते वास्तू मुखार नतमस्तक जालां. हे पवित्र वास्तून गोंयचे बरेच कलाकार घडयले. घडटा… पूण फाटलीं तीन वर्सां आनी कालच्या दिसा मेरेन थंय कितें जाता आनी कितें घडटा तें फक्त त्या गर्भकुडींतल्या नटरंगाक खबर. रंगदेवते कडेन इतलेंच मागणें की बेगीन तुजे कुशींत आमकां खेळपाक मेळूंदी आनी तुची वास्तू राखप्यांक बरी बुद्द प्राप्त जावंदी.
जय नटरंग
नितीन शिवराम नायक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
