भांगरभूंय | प्रतिनिधी
शाळांनी संगीताचे शिक्षक सरकारान पयलीं सावन नेमल्यात, तशेच आतां नाट्यशिक्षकूय नेमल्यात. जांकां ह्या विशयाची आवड आसा, तांणी हाचो जरुर लाव घेवचो. पिर्णांचे नाट्य कलाकार ज्ञानेश्वर पार्सेंकार हांकां नाटकाची आवड. तांणी कला अकादमीचो अभ्यासक्रम पुराय केलो. मागीर तांकां कला संस्कृती खात्यांत नोकरी मेळ्ळी. त्याच खात्यांत नाट्य शिक्षक म्हूण ते वेगळ्या- वेगळ्या शाळांनी वचून विद्यार्थ्यांक नाटकाचीं विवीध आंगां शिकयतात. गांवांतले भुरगे मन लावन शिकतात, मजेची गजाल म्हणल्यार तांकां मात पसून घमेंड, इगो ना, अशें पार्सेकार सांगतात. तांचे कडेन हांवें संपर्क केलो तेन्ना तांणी ह्या नाट्य प्रशिक्षण विशयाचेर बरेंच कितें सांगलें.
तांणी सांगलें, अभिनयाचे गुण उपजत आसूंक जाय. मागीर मार्गदर्शन मेळटा, तशे ते विकसीत जायत चल्ले. म्हाका पयलीं सावन अभिनयाची आवड. घरांत कोणें विरोध करूंक ना. उत्सवी नाटकां जातालीं थंय हांव पावतालो. कोण तरी म्हाका मुजरत व्हरतालो, ही आवड वाडत गेली. सर्तीचीं नाटकां पळोवपाक पयशेय मोडले. बारावी जातकच हांव कला अकादमीच्या रंगमेळ विभागांत अभ्यासक्रम शिकपाक गेलों. थंय सर्गेस्त वसंत जोसलकर आसले. तांचो सोयरो आमच्या पिर्णा गांवचो. ताणें म्हाका खूब मजत केली. कोर्स केले उपरांत हांवें जायत्या नाटकांचें दिग्दर्शन केलें. सर्तींनी वांटो घेतलो. इनामां जोडलीं. दोन- तीन सिनेमांनी लेगीत काम केलें. दो. मोहन आगाशे एका सिनेमांत आसले. तांणी आमकां अभिनयांतली बारीकसाण शिकयली. तुमकां कोणाक जर नाटका विशीं आवड आसा,
जाल्यार तुमी मुजरत हो कोर्स करात. ह्या शिक्षणान म्हाका
समाधान मेळटालें. तेन्नाच कला, संस्कृती खात्याची जायरात वाचूंक मेळ्ळी. हांवें अर्ज केलो आनी म्हजी निवड जाली. मुखार शिक्षक म्हूण हांव गांवांगांवांनी पावलो. नाटकाचें पिशें वाडत गेलें. कंपनीच्या नाटकांनी काम करतना खडेगांठ कलाकारां वांगडां काम कराची संद मेळ्ळी.
ते म्हणटात, अभिनयाक गरज आसता ती बऱ्या आवाजाची. तुमचो चेरो हिरो सारको नासलो तरी भाशा, उच्चार सारके आसूंक जाय. ताचे कडेन आडनदर करची न्हय. तुमची स्मरणशक्त बरी जाय. समयसुचकताय जाय. कित्याक तर नाटक चालू आसतना कसलोय प्रसंग येत ते सांगूंक जायना. तुमचे वांगडचो कलाकार आपलो संवाद विसरूं शकता, नाजाल्यार तो चुकीचें वाक्य म्हणू शकता. त्या वेळार नाटक सांबाळून घेवपाची जापसालदारकी वाडटा. अभिनय करप्याक आतां भरपूर संद आसा. रंगमाची आसा, शेंकड्यांनी चॅनल आसात, सिनेमा आसा, सोशल मिडिया आसा. थळावे कोंकणी भाशेंतूय खूब संद आसा. सगल्यांनी वाचन करचें, खूब नाटकां, सिनेमा पळोवचे. आतां युट्युबा सारकें साधन आसा. त्यो कलाकृती तुमचेर अभिनय संस्कार करतल्यो. रंगमाचयें वयलें तुमचें काम लोक पळयतात. बरें आसल्यार तोखणाय करतात. पयलीं अभिनेत्यांक शिक्षण आसतालेंच अशें ना. आतां तें मेळटा.
अकादमीचो अभ्यासक्रम तुमकां उपेगी पडपाक शकता. गोंयां भायर वचपाचें आसा जाल्यार इंटरनेटाचेर सर्च करचें. म्हायती मेळटली. फक्त प्रवेश घेतना ताका विद्यापीठाची मान्यताय
आसा काय ना, ताची चवकशी करात. शिक्षकां कडल्यान म्हायती घेयात. अभिनया वयलीं पुस्तकां वाचात. नाटकां पळोवपाक विसरूं नाकात.
विद्यार्थ्यांनी ज्ञानेश्वर पार्सेकार हांणी जें कितें सांगलां, ताचो जरुर विचार करचो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
