भांगरभूंय | प्रतिनिधी
होंडाचे खाशेले ग्रामसभेंत खर विरोध; भलायकेचेर परिणाम जावपाची उक्तायली भिरांत
भांगरभूंय । प्रतिनिधी
वाळपयः पिसुर्लें उद्देगीक वसणुकेंत आशिल्ले अंबे मॅटालीक कंपनीच्या विस्ताराक खंयचेच स्थितींत परवानगी दिवची न्हय. ह्या प्रकल्पाक परवानगी दिल्यार सरभोंवतणी रावपी लोकांचे भलायकेचेर वायट परिणाम जातले. सध्या आशिल्लो प्रकल्प व्हड प्रमाणांत प्रदुशण करता आनी ताका लागून लोकांचो हुस्को वाडला, असें सांगून ह्या प्रकल्पाक होंडा पंचायतीचे खाशेले ग्रामसभेंत लोकांनी खर विरोध केलो.
ह्या प्रकल्पाचो विस्तार करचे खातीर अंबे कंपनीन गोंय प्रदुशण नियंत्रण मंडळा कडेन पर्यावरण दाखलो मेळोवपा खातीर आपलो प्रस्ताव दवरला. हे संबंदांत हालींच जनहीत सुनावणी जाल्ली. ते सुनावणेंत थळाव्या लोकांनी ह्या प्रकल्पाक खर विरोध केल्लो. लोकांचें मत समजून घेवचे खातीर सात दिसां भितर खाशेली ग्रामसभा घेवपाचे निर्देश दिले उपरांत होंडा पंचायतीन ही ग्रामसभा आपयिल्ली.
होंडाचे सरपंच शिवदास माडकार हांचे अध्यक्षते खाला घेतिल्ले हे खाशेले ग्रामसभेक निलिमा शेट्ये, प्रमोद गावडे, दीपक गांवकार, सुशांत राणे, सुमेधा माडकार, निलेश सातार्डेकार, स्मिता नाटे, सिया बोडके, रेश्मा गांवकार ह्या पंचां सयत पंचायत वाठारांतले समाज वावुरपी, पर्यावरण मोगी, शेतकार आनी जागरूक नागरीक व्हड संख्येन हाजीर राविल्ले.
सुरवेक सरपंच माडकार हांणी खाशेली ग्रामसभा आपोवपा फाटलो उद्देश स्पश्ट केलो. ह्या वेळार अंबे मॅटालीक कंपनीच्या प्रदुशणाक लागून निर्माण जाल्ल्या समस्यां विशीं तांणी म्हायती दिली. ह्या प्रकल्पाचो विस्तार जालो जाल्यार होंडा वाठारांत कोळसो हब निर्माण जातलो. ताका लागून भलायकेच्यो समस्या आनीक वाडटल्यो. हे खातीर प्रकल्पाच्या विस्ताराक परवानगी दिवची न्हय, अशी तांणी नेटाची मागणी केली.
प्रस्तावीत अहवालांत सरभोंवतणच्या वाठारांत कसलींच दायज थळां नाशिल्ल्याचें म्हणलां. तेचवरी पर्यावरणाचें कसलेंच लुकसाण जावचें ना, अशी फटीची म्हायती दिल्या. हाका सरपंच शिवदास माडकार हांणी खर हरकत घेतली आनी हो अहवाल पुराय चुकीचो आसा. हे संबंदांत प्रत्यक्ष पळोवणी करची, अशी मागणी केली.
समाज वावुरपी भीमराव राणे हांणी सांगलें, ह्या प्रकल्पाच्या विस्तारा संबंदांत निर्माण जावची समस्यां विशीं थळावी आमदार डॉ. दिव्या राणे हांणी गांभिर्यान लक्ष घालचें. ह्या प्रकल्पा संबंदांत तांणी आपली भुमिका जाहीर करची.
समाज वावुरपी बी. डी. मोटे हांणी सांगलें, हो प्रकल्प नागरिकांचे सुरक्षेक मारक आसा. ताका लागून ताच्या विस्ताराक मान्यताय दिवची न्हय. तेचवरी पिसुर्लें उद्देगीक वसणूक रसायनीक झोन म्हूण जाहीर केल्या. हो झोन रद्द करचो, अशीय तांणी मागणी केली.
नसीर शेख हांणी सांगलें, प्रकल्पाचो विस्तार जालो जाल्यार ह्या वाठारांत येरादारी वेवस्थेंत व्हड प्रमाणांत वाड जातली. ताका लागून निर्माण जावपी समस्या थळाव्या लोकांक सोंसच्यो पडटल्यो.
समज वावुरपी झिला गांवकार हांणी सांगलें, हे संबंदांत थळाव्या आमदारांनी लक्ष दिवचें. तशेंच ह्या वाठारांतल्या सगळ्याच लोकांनी ह्या प्रकल्पाच्या विस्ताराक विरोध करचो. सुरवेक पंचायत सचीव मुला वरक हांणी ग्रामसभे विशीं खोलायेन म्हायती दिली. प्रस्तावीत अहवाला प्रमाण प्रकल्प जालो जाल्यार ताचे गंभीर परिणाम कशे जावपाक शकतात, ते संबंदांतलो सविस्तर अहवाल सरकाराक सादर करतले, अशें तांणी सांगलें. पंच दीपक गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
