भांगरभूंय | प्रतिनिधी
केंद्रीय प्रदुशण नियंत्रण मंडळाचे परीक्षण
नवी दिल्ली, खबरां संस्था ः सादारणपणान दिल्लींत वाऱ्याचो वेग वराक 2.5 किमी आसता. पूण, काल दिल्ली चार पटींनी म्हळ्यार वराक 12 ते 16 किमी वेगान वारें व्हांवतालें. हाका लागून दिल्लीचें प्रदुशण उणें जालें. दिल्लीचो एक्युआयंत हे खेपे 339 नोंद जालो. अशें आसून लेगीत दिल्लीची हवेची नोंद सामकीच वायट वर्गांत जाल्या.
अंदूं दिवाळेच्या दुसऱ्या दिसा देशांतलो सगळ्यांत वायट हवेचो दर्जो हरियाणाच्या अंबालांत 367 आनी पंजाबांतल्या अमृतसरांत 350 इतलो नोंद जालो. उपरांत दिल्ली 339, दिल्लीक लागीं आशिल्लो गाझियाबाद 306 आनी गुरूग्राम 309, सोनीपत 290, फरीदाबाद 202, नोयडा 274 आनी ग्रेटर नोयडा हांगा 258 इतलो नोंद जालो. केंद्रीय प्रदुशण नियंत्रण मंडळ (सीपीसीबी) 265 शारांतल्या हवेच्या दर्ज्याचे परीक्षण केले.
ऑक्टोबरांत सगळ्यांत चड उश्णताय
ऑक्टोबर 2024 हो 1901 उपरांत हवामान खात्यान नोंद केल्लो सगळ्यांत उश्ण म्हयनो. ऑक्टोबरांत सरासरी तापमान 26.92 अंश आशिल्लें, जें सामान्या परस 1.23 अंश चड आशिल्लें. रातचें तापमानय 21.85 अंश चड नोंद जालां, जे 20.01 अंश आसपाक जाय आशिल्लें. नोव्हेंबरांत लेगीत तापमान चड उरतलें असो अदमास आसा.
फाटल्या वर्सा परस हवेची स्थिती बरी आसा…
फाटल्या वर्सा फकत 5 शारांनी बरी हवा आशिल्ली. हे खेपे हो आंकडो 8 जालो. गंगटोक, उडुपी, मदुराय आदी देशांनी एक्यूआय 50 सकयल नोंद जाला. 2023 वर्सा 26 शारांनी हवा समाधानकारक आशिल्ली. ह्या वेळार अशीं 52 शारां आसात. 2023 वर्सा 78 शारां हवेच्या वायट वर्गांत आशिल्लीं. हे खेपे मात ती 85 आसात. फाटल्या दिवाळे उपरांत 53 शारांतली हवा वायट आशिल्ली. ह्या वेळार अशीं 12 शारां आसात. हे खेपे हवेच्या वायट, सामकी वायट वर्गांतल्या 97 शारां मदीं 21 शारां राजस्थान, 14 हरियाणा, 12 बिहार, 7 मध्य प्रदेश आनी 5 पंजाबांतली आसात.
सरासरी परस चड तापमान….
हवामान शास्त्रज्ञांच्या मतान ऑक्टोबरांत उत्तर भारतांतलें सरासरी तापमान सरासरी परस चड आशिल्लें. देखून वयल्यान वारें व्हांवत रावलें आनी प्रदुशण उणें उरलें. तापमान उणें जाल्यार हवेची घनताय वाडटा आनी प्रदुशण वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
