भांगरभूंय | प्रतिनिधी
येवकार समितीची जाली निवड
कोच्ची: अखील भारतीय कोंकणी परिशदेचे मनोमिलन संमेलन अंदूं वर्सा कोच्चींत जातलें. कार्यावळ येसस्वी करपा खातीर येवकार समिती वेंचून काडली. कोच्ची सारस्वत असोसिएशन सभाघरांत केरळ कोंकणी अकादमीचे वतीन घडोवन हाडिल्ले सभेंत कोंकणी मोगी आनी कोंकणी मातृभाशी विंगड विंगड
समाजाचे प्रतिनिधी मेळून साबार लोकांनी वांटो घेतलो.
केरळ कोंकणी अकादमीचे अध्यक्ष पी. एन. कृष्णन हांच्या येजमानपणा खाला कार्यावळीचें निवृत्त न्यायाधीश के. के. उत्तरन हांणी दिवली पेटोवन उक्तावण केलें.
सुरवेक प्रो. के. एन. रमेश भट हांणी प्रार्थनागीत गायलें. अकादमीचे सरकर्दशी चन्द्रबाबू यू. शेटी हांणी येवकार दिलो आनी अखील भारतीय कोंकणी परिशदे विशीं आनी मनोमिलन कार्यावळी विशीं संक्षिप्त म्हायती दिली.
ए. श्रीधर पै (गौड सारस्वत ब्राह्मण ग्रामा सभा), बी. रमेश शेट (दैवज्ञ ब्राह्मण सभा), प्रो. जी. मोहन राव (सारस्वत समाज), रमेश अमरावती (केरळ वैश्य समाज), के. प्रकाश (कुडुंबी समाज), अनंत जी. काम्मत, स्यामळा एस. प्रभू, जयानंद के. पै, व्ही. बलराम शेटी (वैश्य वाणी संस्कृती मंडळ), हांणी आपलीं उलोवपां केलीं.
येवकार समितीचे अध्यक्ष म्हूणण प्रो. के. रमेश भट हांची निवड जाली. एस. सुदीश शेणै समितीचे मुखेल निमंत्रक आसतले जाल्यार प्रो. जी. मोहन राव हांची भांडारी म्हूण नेमणूक जाली.
परिशदेचे उपाध्यक्ष आर. एस. भास्कर हांणी निरिक्षक म्हूण वांटो घेतलो. अकादमीचे कार्यदर्शी के. विजयन हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
