भांगरभूंय | प्रतिनिधी
नवी दिल्ली, खबरां संस्था ः अंदू पुराय देशांत खर उश्णताय उरतली असो अदमास हवामान खात्यान उक्तायलो. घडये ताकाच लागून थंड करपी उपकरणांची जशें फॅन, कुलर खास करून एसीची विक्री नेटान वाडत आसा. पॅनासोनिक आनी गोदरेज अॅप्लायन्स ह्या कंपनींच्या म्हणण्या प्रमाण, फाटल्या वर्साच्या तुळेंत अंदू एप्रीलांतच एसी विक्रींत सुमार 40 टक्क्यांनी वाड जाल्या.
कंज्युमर इलॅक्ट्रॉनिक्स आनी अॅप्लायन्स मॅन्युफॅक्चरर्स असोसिएशन हे संस्थेच्या म्हणण्या प्रमाण एसीची विक्री अजून 20-35 टक्क्यांनी वाडूंक शकता. आनी मागणी वाडिल्ल्यान चालू हंगामांत 1.25 कोटीं मेरेन विक्री पावूंक शकता. एप्रीलांतच तांची विक्री सुमार 40% वाडली. मागणी वाडली आसली तरी बाजारांत फावो त्या प्रमाणात पुरवण आशिल्ल्यान ह्या हंगामांत एसीच्या दरांत वाड जावची ना अशें एसी कंपनींच्या अधिकाऱ्यांनी सांगलें.
सध्या देशांतल्या फकत 7% कुंटुंबा कडेन एसी आसा अशें पॅनासोनिक इंडियाच्या एसी विभागाचे मुखेली अभिषेक वर्मा हांणी सांगलें. पूण हालींच्या वर्सांनी परिस्थिती बदलत आसा. वाडत वचपी मध्यमवर्गीय लोकांचे उत्पन्न आनी सोंपें अर्थीक स्थितीत लागून स्मार्ट, इन्वर्टर एसीची विक्री वाडत आसा. वट्ट विक्रींत सुमार 50% तांचो वांटो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
