भांगरभूंय | प्रतिनिधी
पणजी ः अंदूं 10 फेब्रुवारी सावन बारावेचे परिक्षेची सुरवात जाता. अंदूं बारावेच्या बोर्डाचे परिक्षे खातीर वट्ट 17,751 विद्यार्थी बसतले. फाटल्या वर्साच्या तुळेंत ह्या वर्सा 240 विद्यार्थी चड आसात. हातूंत 8498 चले आनी 9253 चलयो हांचो आस्पाव आसा. तेच प्रमाण अंदूं इकरावेत नापास जाल्ले 157 विद्यार्थी थेट बारावेची परिक्षा दितले.
दर वर्सा 10 ते 12 विद्यार्थी थेट बारावेची परिक्षा दितात. अंदूं तांतूत खूब वाड जाल्या. गोंय शालांत मंडळाचे अध्यक्ष भागीरथ शेट्ये हांणी ही म्हायती दिल्या. मजगतीं, अंदूं 50 आयटीआय विद्यार्थीय परिक्षेक बसतले. पूण नेमान परिक्षेक हाजीर आशिल्ल्या वट्ट विद्यार्थ्यांच्या संख्येत हो आंकडो मेजचे नात अशें शेट्ये हांणी सांगलें.
सगळ्या विशयां सयत परिक्षेक (रिपीटर) बसपी विद्यार्थ्यांचो आंकडो 36 आसा. हांतूत 20 चले आनी 16 चलयो आसात. कांय विशय घेवन परतून परिक्षा दिवपी विद्यार्थ्यांचो आंकडो 828 आसा. हांतूत 454 चले आनी 374 चलयो आसात. रिजल्ट सुदारपा खातीर परतून परिक्षा दिवपी 17 विद्यार्थी आसात. हांतूत 11 चले आनी 6 चलयो आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
