भांगरभूंय | प्रतिनिधी
अधिक्षक अक्षत कौशल हांची म्हायती
भांगरभूंय । प्रतिनिधी
पणजीः ह्या वर्सा गोंयच्या दर्यादेग वाठारांनी पर्यटक पुलिसांनी एक हजार परस चड टावट्सांचेर कारवाय केल्या. ते भायर दर्याचेर सोरो पियेवन, गाडी चलोवन धुमशेणां घालून कायद्याचे उल्लंघन करपी पर्यटकांचेरुय पर्यटक पुलिसांनी गुन्यांव नोंद केलां, अशीं म्हायती पर्यटक पुलीस अधिक्षक अक्षत कौशल हांणी दिली.
आमी टावटींगाचे प्रकार कशेंच खपोवन घेवचे नात ही पुलिसांची स्पश्ट भुमिका आसा, अशें उत्तर गोंय पुलीस अधिक्षक अक्षत कौशल जांचे कडेन पर्यटक पुलीस अधिक्षकांचो अतिरिक्त ताबो आसा तांणी सांगलें.
आमकां टावट् दिसलो काय तांकां आमी ताब्यात घेवन पर्यटक संचालका मुखार दवरतात आनी तांकां पर्यटन कायद्या खाला दंड दितात. जे टावट्स असल्यो घडणुको परत परत करतात तांकां आमी अटक सुध्दा करतात. उत्तर गोंयात चडशे दर्यादेग वाठारांतले पुलीस सदांच कारवाय करतात. विशेश करून कळंगुट, हणजूण आनी मांद्यां पुसील स्टेशन. म्हजे कडेन पर्यटक पुलीस अधिक्षक हो ताबो आशिल्ले कारणान पर्यटक पोलिसांक स्पश्ट निर्देश दिल्यात की खंयसर तांकां टावटींग सारके प्रकार वा कायद्याचे उल्लंघन दिसून आयले जाल्यार तांचेर कायदेशीर कारवाय करची अशें कौशल हांणी सांगलें.
ह्या वर्सा सुमार उत्तर आनी दक्षीण गोंयात 1000 दुबावीत टाऊट्सांक पर्यटक पुलिसांनी ताब्यात घेवन तांका थळावे पुलिसांच्या स्वाधीन केल्यात. तशेंच दर्यादेगेर उसरां सोरो पियेवपी 193 पर्यटक आनी दर्यार गाडयो चलोवपी 14 पर्यटकांचेर गुन्यांव नोंद केला. ते भायर उक्तडार कोयर उडोवपी 545 जाणांचेर कारवाय केल्या आनी कोटपा खाला 265 गुन्यांव नोंद केला, अशी म्हायती कौशल हांणी दिली.
टावटींग प्रकार बंद जावचे हे खातीर उत्तर गोंय पुलीस आनी पर्यटक पुलीस कटीबध्द आसात. आमी सगळ्या शँक धनयांक बरोबर घेवन काम करतात. दर 15 दिसांनी हांव तांचे वांगडा बसका घेता आनी पुलीस स्टेशनाचे कर्मचारी तांकां नेमान भेट दितात, अशें कौशल हांणी सांगलें.
अडचणीत सापडत जाल्यार पुलिसांक फोन करचो अशी सुचोवणी दिवपी तखटे आमी शॅकांचेर मारल्यात. ह्या उपक्रमांक लागून पुलीस आनी थळाव्या वेवसायकां मदीं बरो समन्वय तयार जाला आनी आमकां सुरक्षित वातावरण दिवपाक मेळटा. काय त्रुटी आसात तातूंत दुबाव ना, पूण पर्यटकांचो आंकडो वाडचो तांकां सुरक्षा मेळची म्हूण आमी यत्न करत आसात, अशें कौशल हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
