भांगरभूंय | प्रतिनिधी
पणजी : फाटीं दोन वर्सां देशांत सरासरी परस चड मान्सूनच्या पावसाची नोंद जाल्ली. मात अंदूं सरासरीच्या ९४ टक्के मान्सून आशिल्ल्याची शक्यताय ’स्कायमेट’ हे खासगी हवामान संस्थेन उक्तायल्या. ‘एल नीनो’ च्या परिणामाक लागून सरासरी पावस उणो जातलो, आनी मध्य आनी वायव्य भारतांत पावस उणो जावपाची शक्यताय आसा असो अदमास एजन्सी कडल्यान उक्तायला. मजगतीं, भारत हवामान खात्यान अजून पावसाचो अधिकृत अदमास जारी करूंक ना.
स्कायमेट संस्थेन आपल्या प्रसिद्धीपत्रकांत म्हणलां, भारतांत अंदूं सरासरीच्या ९४ टक्के पावस पडपाक शकता. ह्या अदमासान ५ टक्क्यांनी उणें वा वाड जावपाक शकता. जून म्हयन्यांत पावसाचें प्रमाण स्थीर आसतलें, मात एल निनोक लागून जुलय ते सप्टेंबर मजगतीं पावसाचें प्रमाण उणें जावपाची शक्यताय आसा. मान्सून काळांत देशात सरासरी ८६८.९ मिलीमीटर पावसाची नोंद जाता, अंदूं ती ८१७ मिमी मेरेन उरपाची शक्यताय आसा.
सरासरीच्या ९६ ते १०४ टक्क्या मजगतींचो मान्सून हो ’सामान्य’ समजता. अंदूं सरासरी इतलो पावस पडपाची शक्यताय २० टक्के, सरासरी परस उणो पावस पडपाची शक्यताय ४० टक्के, जाल्यार सरासरी परस चड पावस पडपाची शक्यताय १० टक्के आसा. प्रशांत महासागरांत देड वर्स ’ला निना’ची परिस्थिती आशिल्ली, मात आतां थंय ’एनसो न्यूट्रल’ स्थिती निर्माण जावपाची शक्यताय वाडल्या. हाका लागून मान्सूनच्या सुरवातेच्या काळांत ’एल निनो’ सक्रीय जावपाची शक्यताय आशिल्ल्याचे संस्थेन म्हणलां.
गोंयांत पावसाचें प्रमाण उणें?
संस्थेन देशाच्या उत्तर, मध्य आनी पश्चीम वाठारांत उणो पावस पडपाची शक्यताय उक्तायल्या. ईशान्येकडल्या राज्यांत ऑगस्ट आनी सप्टेंबर मजगतीं हेर राज्यांचे तुळेंत अदीक पावस पडपाची शक्यताय संस्थेन उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
