भांगरभूंय | प्रतिनिधी
नवी दिल्ली, खबरां संस्था: ह्या शिंयाच्या दिसांनी थंडी मात्शी उणी पडटली. डिसेंबर ते जानेवारी-फेब्रुवारी मेरेन देशांतल्या जायत्या भागांनी तापमानूय सामान्य उरतलो, असो अदमास हवामान खात्याने सोमारा जारी केला.
विभागा प्रमाण, राजस्थान, हरियाणा, पंजाब, दिल्ली, जम्मू आनी काश्मीर, लडाख, हिमाचल, उत्तराखंड, झारखंड, बिहार, मध्य प्रदेश, छत्तीसगड आनी गुजरातांत फुडले तीन म्हयने शिंयाचे २ ते ६ दीस उणे आसतले.
तशेंच, डोंगराळ राज्यां सोडल्यार डिसेंबरांत हेर सुवातांचेर थंय वार्याचे दीस येवपाची शक्यताय सामकी उणी आसा. तशेंच वायव्य, ईशान्य वाठारांनी पावस उणो आसतलो.
मजगतीं, दिल्ली-एनसीआरांत प्रदूशण आजूनय धोको निर्माण करपी पातळेर आसा. मंगळारा सकाळीं ९ वरां मेरेन हांगा AQI ३०८ ची नोंद जाली.
सोमारा रातीं जम्मू-काश्मीराच्या गुलमर्ग आनी सोनमर्ग बर्फ पडलो. मध्य प्रदेश, राजस्थान, उत्तर प्रदेश आनी बिहारच्या कांय जिल्ह्यांनी पारो १० अंशांचेर पावला.
फेंगल वादळाक लागून दक्षीण भारतांतल्या कर्नाटक, तामिळनाडू आनी केरळ ह्या तीन राज्यांनी घोग्यांनी पावस झडटा. तामिळनाडूंत फाटले ४ दीस वादळाक लागून १२ जाणांक मरण आयिल्ल्याचो दावो केला.
कुलकुल्याचें शीं पडचें ना. कारण बर्फाचे वाठार उणे जाल्यात. पावस वाडलो. हिमालयांत बर्फाळ वाठार अंदूं फेब्रुवारीचे तुळेंत ३२% उणो जाला. तशेंच ह्या वेळार मान्सूनांत १०८ टक्के पावस पडलो. ह्या दोनूय कारणांक लागून हे फावट कुलकुल्याची थंडी पडपाची शक्यताय उणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
