भांगरभूंय | प्रतिनिधी
पणजी ः अंदूं यत्ता धावेचे परिक्षेचे पेपर तपासपाक केंद्रांचो आंकडो 3 वयल्यान 8 केलां. देखून पेपर परिक्षे खातीर नेमिल्ल्या शिक्षकांचो प्रवाशाचो त्रास वाटावलो, आनी पेपर तपासणीचे काम सुरळीत चलता अशी म्हायती गोंय बोर्डाचे अध्यक्ष भगीरथ शेट्ये हांणी ‘भांगरभूंय’ कडेन उलयतना दिली.
पेपर तपासणे खातीर स्थापन केल्ल्या केंद्रांनी फावो त्या प्रमाणांत शिक्षक नाशिल्ल्यान पेपर तपासणेंत अडचणी येतात अशी कागाळ कांय केंद्रां करताली. पूण हे कागाळींत सत्य ना अशें शेट्ये हांणी सांगलें. हाचे पयलीं राज्यांत पेपर तपासणे खातीर फकत तीन केंद्रां आशिल्लीं. देखून शिक्षकांची धांदल जाताली.
हें मतींत दवरून अंदूं उत्तर गोंयांत पेडणें, म्हापशें, कुजिरा आनी दिवचल, तशेंच दक्षीण गोंयांत केपें, कुंकळ्ळी, फोंडें आनी मडगांव केंद्रां स्थापन केल्यांत. अनिवार्य विशयांचे पेपर तपासणे खातीर फावो त्या शिक्षकांची वेवस्था केल्यां.
हिंदी पेपर तपासणे खातीर राज्यांत सुमार 500 शिक्षकांची नेमणूक केल्या. ह्या शिक्षकांची केंद्रां लागीं आशिल्ल्यान सकाळीं 8 वरांचेर पेपर तपासपाचें काम सुरू करतात अशें शेट्ये हांणी सांगलें.
दिवचल केंद्रा खातीर स अतिरिक्त शिक्षक
सध्या दिवचल केंद्रांत नेमिल्ल्या शिक्षकांचो आंकडो फावो तितलो आसा. तरी लेगीत आनीक दोन दिसांनी थंय स अतिरिक्त शिक्षकांची वेवस्था जातली अशेंय शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
