भांगरभूंय | प्रतिनिधी
प्रधानमंत्री नरेंद्र मोदी हांची घोशणा
भांगरभूंय । प्रतिनिधी
पणजी : प्रधानमंत्री नरेंद्र मोदी हांचे अध्यक्षते खाला सोमारा गुजरातांत राष्ट्रीय रानवटी जीव मंडळाची सातवी बसका जाली. तातूंत देशभरांतल्या शिंवांची मेजणी करपाचो निर्णय घेतलो. बसकेंत प्रधानमंत्री मोदी हांणी डॉल्फीन अहवालाचेंय प्रकाशन केलें. मंडळाचे वांगडी राजेंद्र केरकार हे लेगीत बसकेक हाजीर आशिल्ले.
आशियायी शिंवांचे संख्येचो अदमास येवचो हे खातीर दर पांच वर्सांनी मेजणी करतात. हे आदीं 2020 त अशी गणना केल्ली. सोमारचे बसकेंत प्रधानमंत्री मोदी हांणी आशियायी शिंवाचे संख्येच्या अदमासा खातीर ह्याच वर्सा तांची मेजणी करतले, अशें जाहीर केलें.
रानवटी जीव पर्यटना खातीर प्रवास आनी येरादारी वेवस्था सोंपी करचे खातीर फुडारांत चालीक लावपा आशिल्ल्यो उपाय येवजण्यो, नव्या संरक्षीत मळांची निर्मिती तशेंच वाग, हती आनी बिबट्यांच्या रक्षणा खातीर चालीक लायिल्ल्या तशेंच नियोजीत प्रकल्पांची म्हायती प्रधानमंत्र्यान दिली. रानांतलो उजो तशेंच मनीस – जनावरां संघर्श हे सारकिल्लया समस्यांक फुडो करचे खातीर रिमोट सेन्सींग आनी जिओ मॅपींग तशेंच कृत्रीम बुद्धिमत्ता, लर्नींग मशिनां वापरपाचेर भर दिवचो, असो सल्लो प्रधानमंत्री मोदी हांणी सगळ्याच राज्यांक दिलो. मनीस – जनावरां संघर्शाच्या आव्हानाक फुडो करचे खातीर भारतीय रानवटी जीव संस्थेक भास्कराचार्य नॅशनल इन्स्टिट्यूट फॉर स्पेस अॅप्लिकेशन्स अॅण्ड जिओ-इन्फॉर्मेटिक्स (बीआयएसएजी-एन) हाचे कडेन जोडचे, अशीय सुचोवणी प्रधानमंत्री मोदी हांणी दिली.
उत्तर प्रदेशांत सगळ्यांत चड डॉल्फीन
प्रधानमंत्री नरेंद्र मोदी हांणी देशांतल्या न्हंयांनी आशिल्ल्या डॉल्फिना संबंदांतलो अहवाल प्रकाशीत केलो. आठ राज्यांतल्या 28 न्हंयांच्या सर्व्हेक्षणांतल्यान हो अहवाल तयार केला. अहवाला प्रमाण सध्या देशांत वट्ट 6,327 डॉल्फीन आसात. उत्तर प्रदेशांत सगळ्यांत चड डॉल्फीन दिसल्यात. ताचे उपरांत हे वळेरेंत बिहार, अस्तंत बंगाल आनी आसाम ह्या राज्यांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
