भांगरभूंय | प्रतिनिधी
पणजीः फाटल्या वर्सांचे तुळेंत अंदूं भाताचे पिकावळींत उणाव दिसून आयलां. अंदूं 2025 त पावसात सुरू जावपी खरीफ हंगामात भाताची पिकावळ 15 हजार मेट्रीक टन परस चड उणी जाला. अनियमित पडपी पावस, बादांक वेरो पडप आनी मानशेंक खावटे मारप ह्या सारिकिल्ली कारणां शेतांचे लुकसाण जावपा फाटल्यान आसूंये, अशी म्हायती शेतकी खात्यान दिली.
विधानसभेच्या पटलार सांत आन्द्रेचे आमदार विरेश बोरकार हांणी विचारिल्ले प्रश्नाक लेखी जाप दितना शेतकी मंत्री रवी नायक हांणी सांगले, राज्यांत भाताची पिकावळ खरीप हंगामात 23,878 हॅक्टर जमनींत आनी रबी हंगामात 9022 हॅक्टर शेत जमनीर जाता.
खरीफ हंगामात फाटल्या तीन वर्सांत 1,82,502 टन इतली भाताची पिकावळ तयार जाल्या. 2022-2023 त 62,956 टन इतलो भात पिकिल्लो, 2023-24 त भाताचे पिकावळीत वाड जावन 67,698 टन इतले भात पिकून 5012 टन इतली वाड नोंद जाली. पूण ह्या वर्सा 2024-25 त भाताचे पिकावळींत व्हड प्रमाणात उणाव दिसून आयलो. ह्या हंगामात 51,848 मेट्रीक टन भाताची पिकावळ तयार जावन, भाताचें उत्पन्न 15,850 टनांनी देंवलें.
जाल्यार दुसरे वटेन गिमांत सुरू जावपी रबी हंगामात भाताची पिकावळ धादोसकायेची आसा. वर्स 2022-23 त 25,444 टन इतले भाताचे उत्पन्न जालें, 2023-24 त 26,913 टन इतलें भाताचें उत्पन्न नोंद जालें जाल्यार वर्स 2024-25 चो रबी हंगाम अजून मेरेन चालू आसा.
तशेंच शेतकारांक जावपी लुकसाणा विशीं शेतकी संचालनालयाक म्हायती आसा आनी भात शेतीचें लुकसाण जावपा पासत खात्यान येवजण तयार केल्या. अनियमित पावसांक लागून जावपी लुकसाणा खातीर शेतकारांक आधुनिक तंत्रगिन्यान, हवामानाची म्हायती, शेतां बुडचीं न्ही म्हूण वेळा भितर भात रोंवप हे विशीं म्हायती दित आसता. बांधाक वेरो वचून लुकसाणी खातीर माती संवर्धन विभाग तशेंच मुंडकार संघटनांक बरोबर घेवन बांदाचे काम हातांत घेतलां. जाल्यार मानशेची दारां उक्ती जावन शेतां बुडची न्हय हे खातीर मानशेची देखरेख करपा खातीर संबंदीत तालुक्यांचे मामलेदार मुंडकार संघटनेचेर नदर दवरता आनी शेतांनी खारे उदक सोडल्यार तांकां अटक जाता.
जर सैमिक आपत्तीक लागून लुकसाण जाल्यार खात्यान शेतकरी आधार निधी येवजण चालीक लायल्या. जाका लागून अनियमित पावस आनी बांद फुटोन तांची शेतां बुडल्यार शेतकारांक लुकसाण भरपाय मेळटा. जया, ज्योती, कोरगूंट, गोंय धन 1, गोंय धन 2, गोंय धन 3, गोंय धन 4 आनी खार्जत 3 ह्या जातींचे भात गोंयात पिकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
