भांगरभूंय | प्रतिनिधी
नवी दिल्ली, खबरां संस्थाः कर्मचारी भविष्य निधी संघटनेन (ईपीएफओ) 2024-25 अर्थीक वर्सा खातीर कर्मचाऱ्यांच्या भविष्य निर्वाह निधीवेले व्याजदर बदलूंक ना. हाचोच अर्थ फाटल्या वर्सा प्रमाण अंदूं लेगीत देशांतल्या 7 कोटी कर्मचाऱ्यांक 8.25 टक्के व्याज दितले. फेब्रुवारी 2024 वर्सा ईपीएफओन व्याजदर 8.15% वयल्यान 8.25% मेरेन वाडयलो. हाचे आदीं मार्च 2022 वर्सा व्याजदर 8.5 टक्क्यांवयल्यान 8.1 टक्क्यांनी उणो केल्लो. फाटल्या चार दशकांतलो हो सगळ्यांत उणो व्याजदर आशिल्लो.
शुक्रारा केंद्रीय कामगार आनी रोजगार मंत्री मनसुख मांडवीय हांच्या अध्यक्षते खाला ईपीएफओ केंद्रीय विश्वस्त मंडळाचे बसकेंत व्याजदर 8.25 टक्क्यांनी दवरपाचो निर्णय घेतलो. आतां ईपीएफांत जमा केल्ल्या निधीवेल्या व्याजदर मंजुरी खातीर तें अर्थ मंत्रालयाक धाडटले. सरकारान मान्यताय दिले बरोबर ईपीएफओच्या 7 कोटी गिरायकांच्या खात्यांत व्याजाची रक्कम जमा जातली.
सध्या सगळ्यांत चड व्याजदर पीएफचेर
सध्या ईपीएफचेर मेळपी 8.25% व्याजदर हेर बचत येवजण्यां परस सगळ्यांत चड आसा. सुकन्या समृध्दी येवजण 8.2%, ज्येश्ठ नागरिक बचत येवजण 8.2%, राष्ट्रीय बचत प्रमाणपत्र (एनएससी) 7.7%, किसान विकास पत्र 7.5%, पोस्ट ऑफिस (5 वर्सां) 7.5%, पीपीएफ 7.1%, पोस्ट ऑफिस बचत 4%.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
