भांगरभूंय | प्रतिनिधी
पोरूंचे तुळेंत 1388 टनांची वाड
भांगरभूंय । प्रतिनिधी
पणजी : पोरूंचे तुळेंत गोंयांतल्या नुस्त्या उत्पादनांत 1388 टनांनी वाड जाल्या.
अर्थीक वर्स 2023-24 त गोंयात वट्ट 1 लाख 26 हजार 990 टन नुस्तें पडिल्लें. जाल्यार अर्थीक वर्स 2024-25 त तातूंत मात्शी वाड जावन 1 लाख 28 हजार 378 टनांचेर पावलें. नुस्तेमारी खात्या कडल्लयान ही म्हायती मेळ्ळ्या. अशें आसलें तरी 2024-25 ची आंकडेवारी ही तात्पुरत्या स्वरुपाची आसा. ताका लागून नुस्तें उत्पादनाचो आंकडो आनीक वाडपाची शक्यताय आसा, अशें म्हायती खात्यांतल्या वरिश्ठ अधिकाऱ्यांनी दिल्या.
मेळिल्ले म्हायती प्रमाण अर्थीक वर्स 2023-24 चे तुळेंत 2024-25 त सुंगटां, इसवण, वेल्ली, लेपो, माणकी हें नुस्तें खूब पडलें. जाल्यार पोरूंचे तुळेंत अंदूं बांगडे, तारले, मोरी, टुमा, कुल्ल्यो, बाळे हें मात्शें उणें पडलें. 2023-24 त सुंगटां 6549 टन मेळिल्लीं. 2024-25 त तीं 10,071 मेळ्ळीं. 2023-24 त लेपो 1384 टन मेळिल्ल्यो जाल्यार 2024-25 त त्यो 533 टनांनी वाडून 1917 टन जाल्यो. 2023-24 त इसवण 1514 टन पडिल्ले जाल्यार 2024-25 त तातूंत 1203 टनांनी वाड जावन ते 2797 टन जाले.
पोरूं वेल्ल्यो 149 टन पडिल्ल्यो. 2024-25 त त्यो 215 मेळ्ळ्यो. पोरूं लेपो 1384 टन पडिल्ल्यो जाल्यार 2024-25 त त्यो 1917 टन जाल्यो. 2023-24 त माणक्यो 4013 पडिल्ल्यो, 2024-25 त त्यो वाडून 6401 टन मेळ्ळ्यो. पोरूंचे तुळेंत अंदूं बांगडे उणें पडले. 2023-24 त बांगडे 50 हजार 213 टन मेळिल्ले जाल्यार 2024-25 त ते 7485 टन उणे जावन 43 हजार 728 टन मेळ्ळे. 2023-24 त तारले 18 हजार 22 टन पडिल्ले, मात 2024-25 त ते 13 हजार 907 टन मेळ्ळे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
