भांगरभूंय | प्रतिनिधी
पणजी : अंदूं पणजे जावपी ५६व्या आंतरराष्ट्रीय चित्रपट महोत्सवाचें उक्तावण वेगळे तरेन जातलें. शिगमो आनी कार्निवलाची झलक प्रदर्शीय करपाच्या हेतून पोरणें सचिवालय ते मनोरंजन संस्थेच्या इमारती मेरेन चित्ररथ मिरवणूक जातली. उपरांत मनोरंजन संस्था इमारती भायले माचयेर उरिल्ली उक्तावणाची कार्यावळ जातली, अशें मुख्यमंत्री डॉ. प्रमोद सावंत हांणी स्पश्ट केलें. तांणी पर्वरी मंत्रालयांत पत्रकार परिशद घेतली.
फिडे चॅस सर्तीक लागून ताळगांवां डॉ. श्यामाप्रसाद मुखर्जी स्टेडियम उपलब्ध नाशिल्ल्याचो समज चुकीचो. समारोप सुवाळो आदले वरीं डॉ. श्यामाप्रसाद मुखर्जी स्टेडियम हांगाच जातलो. तशेंच उक्तावण जावचें नाा अशें आयकुपाक येवपी संदेशूय चुकीचे आसात. सदचे परस वेगळे तरेन उक्तावण जावचें अशी सुचवणी आयोजकांनी केल्ली. शिगमो आनी कार्निवल ही गोंयची संस्कृती. तिचें दर्शन चित्रपट मळार पुराय संवसारक जावचें, हे खातीर अंदूं चित्ररथ मिरवणुकेन महोत्सवाचें उक्तावण जातलें, अशें मुख्यमंत्री डॉ. प्रमोद सावंत हांणी म्हणलें.
कोळशाचें प्रमाण वाडूंक ना. राज्यांत कोळसो हाताळणीचें प्रमाण वाडूंक ना. राज्य सरकार तशेंच केंद्रान कोळसो हाताळणी विशीं कसलेच तरेची अधिसुचवणी जारी करूंक ना. कोळशाचें प्रमाण १ टनान लेगीत वाडचें ना. मडगांवची सभा कोळशाचेर आशिल्ली काय आनीक कित्या खातीर? तें म्हाका खबर ना, अशी प्रतिक्रीया मुख्यमंत्री डॉ. प्रमोद सावंत हांणी कोळशा आड मडगांवां जाल्ले सभेचेर उक्तायली.
नोकरी घोटाळो : फोंडेंच्या घडणुकेच्या तपासा खातीर नव्यान एफआयआर नोकरे खातीर पयशे दिवपाचो प्रकार जो फोंड्यांत घडिल्लो, ताची नव्यान एफआयआर नोंद करून चवकशी जातली. आनीक नवीं नांवां आयल्यार तांचीय चवकशी जातली. वीजमंत्री सुदिन ढवळीकार हांणी योग्य तरेन चवकशी जावंक नाशिल्ल्याचें म्हज्या कानार घालां, अशें मुख्यमंत्र्यांनी म्हणलें.
पुजा नायकाचेर विस्वास दवरपाक मेळना: सुदिन ढवळीकार
नोकरी घोटाळ्यांतली दुबावीत पुजा नायक ही स्वताची सुटका करपा खातीर नवे आरोप करपाची शक्यताय आसा. तिचेर म्हाका विस्वास ना. तरी आरोपांची चवकशी गुन्यांव शाखेन करपाक जाय. गुन्यांव शाखा चवकशी करता. नोटरे खातीर पयशे दिवपाचो जो प्रकार फोंंड्यां घडिल्लो, ताची पुलिसांनी योग्य तरेन चवकशी करूंक ना, अशें वीजमंत्री सुदिन ढवळीकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
