भांगरभूंय | प्रतिनिधी
परिक्षे संबंदी एससीईआरटी नवे धोरण तयार करतले
पणजीः राज्य शिक्षण संशोधन आनी प्रशिक्षण मंडळान (एससीईआरटी) पणजेंतल्या मुष्टीफंड संस्थेक अंदूं यत्ता चवथेची प्रस्नपत्रिका काडपाक परवानगी दिल्या. ह्या निर्णयाक लागून मुष्टीफंडांतल्या चवथेच्या विद्यार्थ्यांक थाकाय मेळ्ळी. 3 ते 8 वीच्या परिक्षे संबंदी एससीईआरटी नवे धोरण तयार करतले अशी म्हायती संचालक मेघना शेटगांवकार हांणी दिली.
पणजेंतल्या मुष्टीफंड संस्थेन चवथीच्या विद्यार्थ्यां खातीर एनसीईआरटी पुस्तकां चालीक लायिल्लीं. हेर शाळांनी पयलींचीच (एससीईआरटीची) पुस्तकां वापरतात. तिसरी ते आठवी मेरेनच्या सत्रांतल्या परिक्षे खातीर समान प्रश्नपत्रिका एससीईआरटी काडपाचे आशिल्ल्यान विद्यार्थ्यां खातीर एक समस्या निर्माण जाल्ली. पुस्तकां एनसीईआरटीची आनी प्रस्नपत्रिका वेगळीं अशीं परिस्थीती निर्माण जाल्ली. हाचेर उपाय म्हूण एससीईआरटीच्या सुकाणू समितीची बसका जाली. बसकेंत मुष्टीफंड संस्थेक अंदूं दोनूय सत्रांचे परिक्षेचे पेपर काडपाची परवानगी दिवपाचें थारायलें.
मजगतीं, राज्यांत अनुदानित आनी विनाअनुदानित शाळा आसात. तिसरी ते आठवी मेरेनच्या सत्र परिक्षे खातीर समान पेपर काडपाचो निर्णय एससीईआरटीन घेतला. फुडाराक अशें तरेच्यो समस्या निर्माण जावच्यो न्हय म्हूण परिक्षे संबंदीं खाशेलें धोरण तयार करतले. हे बसकेंत धोरणाचेरूय चर्चा जाली अशी म्हायती संचालक मेघना शेटगांवकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
