भांगरभूंय | प्रतिनिधी
फार्मा उत्पादनां आघाडेर
भांगरभूंय । प्रतिनिधी
पणजीः पोरूंचे तुळेंत गोंयांतल्यान जाल्ले निर्गतींत वाड जाल्या. एप्रील ते सप्टेंबर 2023 त गोंयांतल्यान 9,313 कोटी रुपयांच्या म्हालाची हेर देशांनी निर्गत जाल्या. जाल्यार एप्रील ते सप्टेंबर 2024 त तातूंत 479 कोटी रुपयांची वाड जावन सुमार 9,792 कोटींच्या म्हालाची निर्गत जाल्या. पोरूं भशेनूच अंदूं लेगीत निर्गतींत फार्मा उत्पादनां आघाडेर आसात. केंद्रीय वाणिज्य आनी उद्देग खात्यान ही आंकडेवारी जाहीर केल्या.
अंदूं वयल्या काळांत गोंयांतल्यान जाल्ले वट्ट निर्गतींत फार्मास्युटिकल उत्पादनांचो वांटो 51.77 टक्के आसा. ह्या काळांत गोंयांतल्यान सुमार 4,982 कोटी रुपयांची फार्मास्युटिकल उत्पादनांची निर्गत जाल्ली. फार्मास्युटीकला उपरांत अभियांत्रिकी म्हालाची निर्गत जाल्या. ताचें मोल सुमार 1,558 कोटी रुपया इतलें आशिल्लें.
तशेंच अंदूं सेंद्रीय आनी असेंद्रीय सारीं 917 कोटी रुपया, इलेक्ट्रॉनीक उत्पादनां 842 कोटी रुपया, मरीन उत्पादनां 339 कोटी रुपया, प्लास्टीक आनी लिनोलेयम 235 कोटी रुपया, मीन 156 कोटी रुपया जाल्यार 520 कोटी रुपयांचीं हेर मिश्र उत्पादना निर्गत केलीं.
मेळिल्ले म्हायती प्रमाण पोरूंचे तुळेंत अंदूं रसायनां, इलेक्ट्रॉनीक, मरीन, मीन हांची निर्गत उणी जाल्या. जाल्यार अभियांत्रिकी आनी फार्मा उत्पादनांची निर्गत वाडल्या.
वखदां निर्गतींत गोंय सातवे सुवातेर
वखदां वा फार्मा उत्पादनांचे निर्गतींत गोंय ल्हान राज्यांत मुखार आसा. पुराय देशाचो विचार केलो जाल्यार गोंय सातवे सुवातेर आसा. एप्रील ते सप्टेंबर 2024 त देशांतल्यान जाल्ले वखदांचे वट्ट निर्गतींत गोंयांतल्यान जाल्ले निर्गतीचो वांटो 4.56 टक्के आशिल्लो.
5.48 कोटी रुपयांच्या काजूची निर्गत
एप्रील ते सप्टेंबर 2024 त गोंयांतल्यान 5.48 कोटी रुपया मोलाच्या काजूची निर्गत जाल्या. काजू निर्गतींत गोंय देशांत सातव्या नंबराचेर आसा. हे मजगतीं, पुराय देशांतल्यान 1,169 कोटी रुपयांच्या काजूची निर्गत जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
