अंदूं काजींचें पीक उणें

भांगरभूंय | प्रतिनिधी

काजकार : 60 टक्के लुकसाण जाल्ल्याचो दावो

भांगरभूंय । प्रतिनिधी

पणजीः अंदू परतून एक फावट काजूच्या पिकांक मार बसला. काजकारांनी हुस्को उक्तावन अंदूंच्या मोसमांत आतां मेरेन फक्त 50 ते 60 टक्के मरेन पीक तयार जालां. काजींचो मोसम अजून मेरेन चालू आसा, पूण काकाडे लागपाचें आतां सावन बंद जाल्यात, अशें काजकारांनी सांगलें. मजगतीं काजूचे पिकावळींत उणाव जालां हें शेतकी संचालनालयान मान्य करून कांय दिसांनी हें चित्र स्पश्ट कळटलें, अशें सांगलें.

आदींच काजींचो मोसम सुरू जावपाक उशीर जाल्लो, हाका लागून हुर्राक काडपाचो मोसम लांबलो. उपरांत काजी सारक्यो लागूंक ना, अश्यो कागाळी काजकार अदींमदीं उक्तायताले. हे विशीं गोंयच्या काजकारांचीं मतां जाणून घेतलीं. तांणी दिल्ले म्हायती प्रमाण, फाटलीं चार वर्सां गोंयांत काजी लागपाचें प्रमाण उणें जायत चल्लां. अंदूं जाल्यार सामकोच मार बसला आनी बदलतें हवामान ताचे फाटलें कारण आसूं येता, असो अदमास तांणी उक्तायला.

हे विशीं उलयताना सत्तरीचे काजकार रणजीत राणे हांणी सांगलें, परंपरीक आनी कलमाच्यो काजी एकदांच लागल्यो. ताका लागून काजींचो उणाव निर्माण जाला.

सादारण साडे तीन म्हयने काजींचो मोसम आसता. अंदूं फक्त एकूच म्हयनो काजी लागल्यो आनी हो मोसम उणो जालो. हो मोसम तिगतालो आनी मे मेरेन काजी लागतल्यो. पूण ह्या वेळार एकेच खेपे पीक तयार जावन वायट परिणाम जाला. म्हुट्ट्यांचो आकार लेगीत ल्हान जाला आनी पिकावळ सामकी उणी जाल्या. सुमार 50 टक्के अजून मेरेन पिकावळ तयार जावंक ना, अशें राणे हांणी सांगलें.

म्हुट्टो बारीक आशिल्ल्यान काजुच्या रोसाची पुरवण उणी जाल्या. खूबश्या वाठारांनी कांकाडे लेगीत धरूंक ना. कांय कडेन काजी काळ्यो पडल्यात, नितळ नात आनी तांचो आकारूय ल्हान जाला. मदींच दमट वातावरण तयार जाल्ल्या कारणान हें वातावरण काजीं खातीर मारक थारलें. सादारण 60 टक्के तरी लुकसाण आमकां काजकारांक जालां, अशी कागाळ राणे हांणी केली.

फाटल्या दिसांनी पडिल्ल्या आडवेळ्या पावसाचो परिणाम जावंक ना. जर काजीक चंवर आशिल्लो जाल्यार ताचो परिणाम जावपाचो. काजी चवरूंक नाशिल्ल्यान परतून काजी तयार जावपाक पावसाचो व्हडलोसो परिणाम जावचो ना, अशें राणे हांणी सांगलें.

कुंकळ्ळेचे काजकार सत्यवान देसाय हांणी सांगलें, कांय वाठारांनी अंदूं 50 ते 55 टक्के इतलो उणाव काजू पिकांत दिसून आयला.

आतां फुडलो म्हयनोभर तरी काजींचो मोसम चलतलो. सादारण 15 मे मेरेन काजी लागतात. पूण सध्याची काजींचे पिकावळीची स्थिती पळयल्यार फुडाराक बरें पीक येतले हाची आस्त उणी आसा. ताका लागून काजू पिकावळींत 50 टक्के उणाव जालां, हातूंत कसलोच दुबाव ना, अशें देसाय हांणी सांगलें.

मदींच तापमानांत वाड जाल्ल्यान काजीच्या परागण प्रक्रियेचेर परिणाम जावन ताका कांकाडे फावो तशे धरूंक नात. अंदूं काजींचो मोसम 15 दीस फुडें धुकल्लो आनी उपरांत तापमान वाडीचो ताचेर परिणाम जालो. ज्यो कलमाच्यो काजी आसात तांची पिकावळ उणी जाल्या जाल्यार परंपरीक पोरण्यो काजी आसात तांची पिकावळ बरी आसा, अशें देसाय हांणी सांगलें. मजगतीं, शेतकी संचालक संदीप फळदेसाय हांकां विचारल्यार तांणी सांगलें, काजीचें पीक अंदूं मात्शें कमी आसा. फुडल्या 10-15 दिसांनी कितलें उत्पादन देंवलां हें स्पश्ट जातलें.