भांगरभूंय | प्रतिनिधी
पणजीः अरबी दर्यांतलो उण्या दाबाचो पट्टो आनी उदेंत दर्यादेगेर मोंथा चक्रवादळाक लागून अंदूं ऑक्टोबरांत व्हड पावस पडलो. 1 ते 31 ऑक्टोबर ह्या काळांत राज्यांत सरासरी 14.78 इंच पावस पडलो. हाका लागून अंदूं ऑक्टोबरांत फाटल्या 97 वर्सांत ऑक्टोबर म्हयन्यांत पांचवे सुवातेर पावस पडलो. हाचे आदीं ऑक्टोबर 2019 वर्सा सगळ्यांत चड पावस 21.52 इंच नोंद जाल्लो.
गोंयांत शुक्रारा उश्ण आनी दमट हवामानाची खेळ सुरू आशिल्ली.
अदी मदीं मध्यम पावसाची नोंद जाल्ली. 1 ते 6 नोव्हेंबराच्या मजगतीं विरळ पावस पडपाची शक्यताय हवामान खात्यान उक्तायल्या. ह्या स दिसां खातीर पावसाचो अलर्ट जारी करूंक ना. गोंयांत 24 वरांत सरासरी 11.6 मिलिमीटर पावस पडलो. पणजे शुक्रारा चडांत चड तापमान 32.2 डिग्री सेल्सियस नोंद जालां.
1 ते 31 ऑक्टोबर ह्या काळांत राज्यांत सगळ्यांत चड पावस मुरगांवां 19.60 इंच पडला. पेडण्यां 19.59 इंच, धारबांदोडें 18.31 इंच, पणजी 18.0 इंच, काणकोणां 17.32 इंच, पोरणें गोंय 15.65 इंच, दाबोळी 14.40 इंच, म्हापशें 14.37 इंच, सांखळी 13.25 इंच, मडगांवां 10.45 इंच, केपें 9.85 इंच, फोंडें 9.41 इंच आनी सांगें 9.15 इंच पावसाची नोंद जाल्या.
स म्हयन्यांत 164 इंच पावस पडलो
गाेंयांत 1 मे ते 31 ऑक्टोबर ह्या काळांत 163.98 इंच पावस पडला. मे म्हयन्यांत 25.77 इंच, जूनांत 31.34 इंच, जुलयांत 46.69 इंच, ऑगस्टांत 35.22 इंच, सप्टेंबरांत 10.17 इंच आनी ऑक्टोबरांत 14.78 इंच पावस पडला.
ऑक्टोबर म्हयन्यांतलो सगल्यांत चड पावस
वर्स / पावस (इंचात)
2019 / 21.52
2006 / 16.68
1955/ 16.26
1985 / 15.52
2025 / 14.78
2009 / 13.85
1931 / 13.54
1928 /13.09
2010 / 12.81
2024 / 11.81
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
