भांगरभूंय | प्रतिनिधी
११ एप्रील ते ३० एप्रील मेरेन अर्ज स्विकारतले
पणजी : कला, वाणिज्य आनी विज्ञान फांट्यांतल्या आनी हेर पदवी अभ्यासक्रमा खातीरची महाविद्यालयीन प्रवेश प्रक्रिया अंदूंय ऑनलायन पद्दतीन जातली. ११ एप्रील ते ३० एप्रील ह्या काळांत ऑनलायन स्वरूपांत अर्ज स्वीकारतले, अशी म्हायती उच्च शिक्षण संचालक भूषण सावयकार हांणी दिली. बारावेचो निकाल अंदूं बेगीनूच जाल्ल्यान महाविद्यालयीन प्रवेश प्रक्रियाय बेगीनूच सुरू जातली.
अर्ज स्विकारले उपरांत पात्रता वळेरी आनी गुणवत्ता वळेरी जाहीर करतले. ते प्रमाण प्रवेश दितले. अंदूं बारावेचो निकाल २७ एप्रिलाक म्हणल्यार २२ दीस पयलींच जालो. दर वर्सा तो २० मे उपरांत जातालो. निकाल जाहीर जरी जालो तरी गुणपत्रिका मेळपा वांगडाच हेर प्रमाणपत्रां घेवपा खातीर विद्यार्थ्यांक जाय तसो वेळ मेळपाक जाय. हे खातीर ११ एप्रील सावन अर्ज स्विकारण्याची तारीख निश्चीत केल्या. तशेंच परत तपासणी, परत मेजणेची प्रक्रीयाय आजून जावपाची आसा. हाका लागून निकाला उपरांतूय कांय विद्यार्थ्यांच्या गुणांनी बदल जावपाची शक्यताय आसा. प्रवेशा खातीर www.dhe.goa.gov.in. ह्या पोर्टला वरवीं अर्ज सादर करप गरजेचें.
वैजकी, अभियांत्रिकी, फार्मसी ह्या वेवसायीक महाविद्यालयांतली प्रवेश प्रक्रीया तांत्रीक शिक्षण संचालनालया वतीन जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
