भांगरभूंय | प्रतिनिधी
पणजीः गोंयांत फाटल्या पर्यटन हंगामांत मुरगांव बंदर प्राधिकरणाच्या (एमपीए) क्रुझ टर्मिनलाचेर ३८ क्रुझ बोटी धक्क्यार लागल्यात आनी हे बोटींतल्यान ६७ हजार परस चड पर्यटक गोंयां पावल्यात. राज्यांत क्रुझ पर्यटनाक उर्बा दिवपा खातीर केंद्र सरकारान क्रुझ भारत मिशन चालीक लायलां, अशी म्हायती केंद्रीय केंद्रीय जहाज, बंदर आनी न्हंय येरादीर मंत्री सरबंदा सोनावाल हांणी लेखी जापेंत दिल्या.
राज्यसभेचे खासदार सदानंद शेट तानावडे हांणी राज्यसभेंत विचारिल्ल्या प्रस्नाक लेखी जाप केंद्रीय मंत्री सोनावाल हांणी दिल्या.
१ जानेवारी २०२४ ते ३० जून २०२५ मजगतीं राज्यांतल्या एमपीए बंदरावेल्या क्रुज टर्मीनलाचेर ३८ क्रुझ बोटी धक्याक लागून हे बोटींतल्यान ६७,५९४ इतले पर्यटक गोंयांत पावल्यात. हे क्रुझ बोटींतल्यान सरकाराक ४.८२ कोटी इतलो महसूल आयला.
गोंयांत क्रुझ पर्यटनाक उर्बा दिवपा खातीर ३० सप्टेंबर २०२४ वर्सा भारत सरकारान क्रुझ भारत मिशन भारत सरकारान सुरू केला. ह्या मिशना खाला धोरण, नियमन आनी क्रुझ मळार निगडीत वेगवेगळ्या पैलू सयत अंतर मंत्रालय साचो तयार करता. तशेंच संबंदीत नियमन एजन्सी जशे की कस्टम, इमिग्रेशन, सीआयएफ, राज्य पर्यटन खातें, राज्य मेरीटायम एजन्सी, जिल्लो प्रशासन आनी थळाव्या पुलिसांक आस्पावन घेता.
ह्या मिशनाच्या कामगीरीचो नियाळ घेतल्यार ह्या उपक्रमा खाला २०२९ मेरेन चार लाख नोकर्यो तयार करपाची मोख दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
