भांगरभूंय | प्रतिनिधी
पणजी : अंदूंच्या (२०२५ – २६) शिक्षणीक वर्सा सावन यत्ता सवी आनी धावे खातीर राष्ट्रीय शिक्षण धोरण (एनईपी) लागू जातलें. हे विशींचें परिपत्रक शिक्षण खात्यान जारी केलां. यत्ता सवे खातीर ९, जाल्यार धावे खातीर १० विशय आसतले. सवे खातीर एससीईआरटी वतीन समान पेपर काडटले. तपासणी मात शाळां वतीन जातली.
सवी आनी धावे खातीर अंदूंच्यान एनईपी लागू जातली अशी घोशणा आदींच जाल्ली. तरी समितीचे बसकेंत शिक्को मारले उपरांत शिक्षण खात्यान आतां कार्यवाहीचें परिपत्रक जारी केलां. सवे खातीर नवीन पुस्तकां लागू जातलीं. धावे खातीर मात आदलींच पुस्तकां वापरतले.
यत्ता सवे खातीर भाशा (कोंकणी/ मराठी), इंग्लीश, हिंदी/ हेर भारतीय भाशा, गणीत, विज्ञान, समाज शास्त्र, वेवसायीक (वोकेशनल) शिक्षण, शरिरीक शिक्षण आनी कला शिक्षण (आर्ट) हे विशय आसतले. तीन भासो आनी हेर स विशय मेळून ९ विशय जातात.
धावे खातीर णववी प्रमाण तीन भाशा आनी हेर सात विशय आसतले. कोंकणी/ मराठी, इंग्लीश, हिंदी/ भारतीय भाशा, गणीत, विज्ञान, समाज शास्त्र, वेवसायीक (वोकेशनल), शरिरीक शिक्षण, कला शिक्षण आनी इंटर डिसीप्लीनरी शाखा हे विशय आसतले. विशयाचें दरेक वर ४० मिनटांचें आसतलें आनी सप्तकाक ४८ वरां घेवचीं पडटलें.
वर्साचे गरजेचे शिक्षणीक वरां (१२०० वरां) पुराय जावपा खातीर अंदूं एप्रील सावन सवी आनी धावेचे वर्ग सुरू करपाचो निर्णय जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
