भांगरभूंय | प्रतिनिधी
स्कायमेट संस्थेचो अदमास; भारतीय हवामान खात्याचो अजून अदमास ना
पणजी: स्कायमेट ह्या खाजगी हवामान संस्थेन अंदूंचो मॉन्सून सामान्य म्हणल्यार सरासरी इतलोच आसतलो असो अदमास उक्तायला. संस्थेन जारी केल्ल्या पत्रका प्रमाण अंदूं भारतांत सरासरी परस 96 ते 104 टक्के मॉन्सून आसपाची शक्यताय आसा. हाचे आदीं एपीईसी हे संस्थेन मॉन्सून सरासरी इतलोच आसपाची शक्यताय उक्तायिल्ली. पूण भारतीय हवामान खात्यान मॉन्सुनाचो अधिकृत अदमास अजून जारी केल्लो ना.
स्कायमेट संस्थेन आपल्या प्रसिद्धी पत्रकांत म्हणलां की, भारतांत अंदूं सरासरीचे 103 टक्के मॉन्सून पडूंक शकता. ह्या अदमासांत 5 टक्के उणो वा चड जावंक शकता. एल निनो उप्रासपाची शक्यताय नाशिल्ल्यान हाचो मॉन्सुनाचेर परिणाम जावचो ना. मुळाव्या अदमासा प्रमाण इंडियन ओशन डायपोल ईएनएसओ ह्या दोन प्रणालींचो सकारात्मक परिणाम जावन मॉन्सून समाधानकारक पडपाची शक्यताय आसा. अंदूंचा मॉन्सून सुरवेच्या काळांत थोडो उण्यां प्रमाणांत आसतलो पूण कांय म्हयन्यांनी तो प्रभावी जातलो.
सरासरीच्या 96 ते 104 टक्क्यां मजगतचो मॉन्सून हो सामान्य वा सरासरी इतलोच समजतात. जून म्हयन्यांत सरासरीच्या 96 टक्के, जुलय म्हयन्यांत 102 टक्के, ऑगस्टांत 108 टक्के जाल्यार सप्टेंबरांत सरासरीच्या 104 टक्के पावसाची शक्यताय आसा.
मजगतीं मंगळारा पणजेंत चडांत चड 34.5 अंश सेल्सियस तापमानाची नोंद जाली. जाल्यार मुरगांवां चडांत चड तापमान 34.2 अंश सेल्सियस उरलें. आयज (बुधवारा) वातावरण उश्ण आनी दमट आसपाची शक्यताय आशिल्ल्यान खात्यान यलो अलर्ट जारी केला.
गोंयांत चड पावस
संस्थेन देशांत अस्तंत आनी दक्षीण वाठारांत बरो पावस पडपाची शक्यताय उक्तायल्या. महाराष्ट्र, मध्य प्रदेशांत फावोसो पावस पडपाची शक्यताय आसा. अस्तंत घांटांत चड करून गोंय, केरळ आनी कर्नाटकाच्या दर्यादेग वाठारांनी चड पावस पडपाची शक्यताय आसा. जाल्यार उत्तर भारतांतलीं दोंगराळ राज्यां तशेंच ईशान्ये कडल्या राज्यांनी उणो पावस पडपाची शक्यताय संस्थेन उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
