भांगरभूंय | प्रतिनिधी
2018 उपरांत पयलेच खेपे 9.6 टक्के पावस उणो
पणजी: शुक्रारा मॉन्सून हंगामाची सांगता जाली. ह्या वर्सा गोंयांत मॉन्सूनाचो पावस 107.08 इतलो पडलो. सर्वसादारण 118 इंच पावसा परस हें प्रमाण उणें आसलें तरी तें व्हडलेशें विचारांत घेनात. ताका लागून जरी 9.6 टक्के पावसाची तूट आसली तरी पावसाचें प्रमाण सामान्य आशिल्ल्याचें हवामान खात्याचे शास्त्रज्ञ राहुल मोहन हांणी सांगलें.
ह्या वर्सा जून म्हयन्यांत पावस पडटा ताचे परस 8 टक्के पावस उणो पडलो. पूण जुलयांत मात 12 टक्के चड पडिल्ल्यान जूनाचें प्रमाण भरून काडलें. परतून ऑगस्टांत उणो पावस पडलो. पूण सप्टेंबरांत 8 टक्के चड पावस पडिल्ल्यान हें प्रमाण कांय प्रमाणांत भरून काडलें. तरी लेगीत अंदूं पावसांत तूट जाली. 2018 उपरांत पयलेच फावटी पावसांत तूट जाली. 2019 वर्सा 30 टक्के, 2020 वर्सा 40 टक्के, 2021 वर्सा 5 टक्के चड पावस पडिल्लो.
ऑगस्ट म्हयन्यांत उणो पावस पडिल्ल्यान ह्या वर्साच्या पावसांत तूट आसपाचें मुखेल कारण आसा. बंगालचे खाडींत आनी अरबी दर्यांत वट्ट उण्या दाबाचे पट्टे तयार जाले. पूण ते उत्तरे वटेन सरकिल्ल्यान ताचो गोंयच्या पावसाचेर कसलोच परिणाम जालो ना. 2019, 2020 चे तुळेन ह्या वर्सा ऑगस्ट म्हयन्यांत तीन पट उणो पावस पडलो.
गोंयांतल्या 13 केंद्रा वयल्या वाळपय केंद्राचेर सगल्यांत चड 144.29 इंच पावसाची नोंद जाली. जाल्यार सगल्यांत उणो 81.96 इंच पावसाची दाबोळे नोंद जाली. फाटलीं दोन वर्सां सगल्यांत चड पावसाची नोंद जाल्ल्या पेडणें केंद्रार 135.31 इंच पावस जाला. हें गोंयांतले सगल्यांत चड पावस पडपी दुसऱ्या क्रमांकाचें केंद्र थारलां.
ह्या वर्सा 7 जुलय दिसा सकाळीं 8.30 वरां सावन 8 जुलय सकाळीं 8.30 वरां मेरेन 24 वरांतलो सगल्यांत चड 6.37 इंच पावसाची नोंद जाल्या. फाटल्या 9 वर्सांतलो सगल्यांत चड पावसाची नोंद ह्या एका दिसांत जाल्या. जाल्यार 13 केंद्रां मदीं 8 जुलय दिसा सांगें केंद्रार सगल्यांत चड 9.17 इंच पावसाची नोंद जाल्या. ह्याच दिसा हवामान खात्यान गोंयांत रेड अॅलर्ट जारी केल्लो. कारण लोकजीण विस्कळीत जाल्ली.
मॉन्सून परतुपाची सामान्य तारीख 14 ऑक्टोबर आसा. पूण उत्तर भारतांतल्यान 17 सप्टेंबर पसून तो परतत आशिल्ल्यान गोंयांतूय रोखडोच मॉन्सून परतून वचपाची शक्यताय आसा. 1 ऑक्टोबरा सावन मॉन्सूना उपरांतचो पावस सुरू जातलो. त्या काळांतूय दर्यांत चक्रीवादळ जावपाची शक्यताय आसता. ताका लागून विजेचे जोगलावणे सयत उटंगाराच्या पावसाची शक्यताय न्हयकारूं येना अशें राहुल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
