अंदूंचो इफ्फी सासणाचो उरतलो उगडासाक

भांगरभूंय | प्रतिनिधी

श्वेतिका सचनः कोरोना म्हामारी उपरांत पयलेच खेपे व्हड प्रमाणांत ऑफलायन आयोजन

भांगरभूंय । प्रतिनिधी

पणजीः कोरोना म्हामारी उपरांत पयलेच खेपे व्हड प्रमाणांत ऑफलायन पद्दतीन आंतरराष्ट्रीय चित्रपट महोत्सवाचें (इफ्फी) आयोजन करतले. विवीध सांस्कृतीक आनी मनरिजवणेच्या कार्यावळींक लागून अंदूंचो इफ्फी सासणा खातीर उगडासाक उरतलो. इफ्फी खातीर 5 हजार वांगड्यांची नोंदणी जाल्या. महोत्सवाची मुख्य कार्यकारी अधिकारी आयएएस श्वेतिका सचन हांणी ही म्हायती दिली.

गोंय मनरिजवण संस्थे कडेन सगळे तरेच्यो मुळाव्यो सुविधा आनी सरबराय करपाची जापसालदारकी आसा. जाल्यार हेर सगळें आयोजन राष्ट्रीय चित्रपट उदरगत म्हामंडळ करतलें. दर वर्सा इफ्फी खातीर सुमार 16 ते 17 कोटी रुपया खर्च जातात. मात अंदूं कांय नव्या कार्यावळींचें आयोजन जातलें, ताका लागून खर्चांत वाड जावपाची शक्यताय आसा, अशें सचन हांणी सांगलें.

अंदूं मिरामार दर्यादेगेर, आल्तिना वयल्या जॉगर्स पार्क आनी मडगांवच्या रवींद्र भवनांत उक्तो पड्डो लायतले. रसीक ह्या पड्ड्यांचेर चित्रपटांचो आस्वाद घेवपाक शकतले. अंदूं गोंय मनरिजवण संस्था ते कला अकादमी ह्या वाठारांत कला प्रदर्शन मांडटले. तेच वांगडा कांय खाणाचे गाडेय उबारतले. भगवान महावीर भुरग्यांची बाग तशेंच कला बागेंत मनरिजवण विभाग तयार केल्यात. थंय विवीध कार्यावळी जातल्यो. मजगतीं, अंदूं कार्नावाल आनी शिगम्याची मिरवणूक अणभवपाक मेळटली. 26 नोव्हेंबराक ही मिरवणूक जातली, अशें सचन हांणी सांगलें.

राजधानी सयत गोंयांत खूबश्या वाठारांनी इफ्फीची सजावट सुरू जाल्या. इफ्फी खातीर पणजी ल्हवू ल्हवू सजपाक लागल्या.

उक्तावण सुवाळ्याक कार्तीक, वरुणाची चर्चा

उक्तावण सुवाळ्याक सिने अभिनेते कार्तीक आर्यन आनी वरुण धवन हांच्या नांवांची चर्चा सुरू आसा. मात अजून खंयचेंच नांव निश्चीत जावंक ना. राष्ट्रीय चित्रपट उदरगत म्हामंडळा कडल्यान फुडल्या दोन दिसांनी नांव निश्चीत जावपाची शक्यताय आसा.