भांगरभूंय | प्रतिनिधी
पणजी : हालींच जाल्ल्या केंद्रीय अर्थसंकल्पा कडल्यान देशभरांतल्या कामगारांक जायत्यो अपेक्षा आशिल्ल्यो. मात कामगारांक कांयच मेळूंक ना. हाचे बदला अंदूंचो अर्थसंकल्प हो कामगार विरोधी आशिल्ल्याचे दिसून येता, अशी टिका ‘आयटक’चे अॅड. सुहास नायक हांणी केली. संघटणे वतीन बुधवारा पणजे आयोजीत केल्ले निशेध सभेंत ते उलयताले. ह्या वेळार कामगार फुडारी प्रसन्न उटगी आनी हेर कामगार आशिल्ले. ह्या वेळार तांणी संघटणेच्यो विवीध आडकून उरिल्ल्यो पुराय करपाची मागणी केली.
अॅड. नायक हांणी सांगलें, अंदूंच्या अर्थसंकल्पांत शिक्षण आनी भलायके खातीर सामकी उणी तरतूद केल्या. वट्ट अर्थसंकल्पाच्या प्रमाणांत शिक्षणाचेर फकत २.६ टक्के जाल्यार भलायकेचेर १.९ टक्के तरतूद केल्या. हाका लागून कामगार, शेतकरी, बेरोजगार युवक तशेंच मध्यमवर्गीयांकूय शिक्षण आनी भलायके वयलो खर्च परवडचो ना. हाका लागून ह्या वर्गाक म्हारगायेक तोंड दिवचें पडटलें. सरकारान बारा लाख रुपयां मेरेन आयकर माफ जरी केला असलो तरी हेर करांच्या रुपांत मध्यम वर्गाक म्हारगायेचें वारें बसतलेंच.
कामगार संघटणेने मनरेगा वेतन, कार्पोरेट कर वाडोवपाची तशेंच शारी रोजगार हमी लागू करपाची शिफारस केल्ली. मात, हातूंतली एकूय मागणी मान्य करूंक ना. अप्रत्यक्ष कर आनी सेसाक लागून सामान्य नागरिकांचेर करांचें वजें वाडटलें. कृषी मार्केटिंग धोरणाक लागून सामान्य शेतकार शेतांतल्यान भायर पडून ती सुवात कॉर्पोरेट कंपनी घेवपाची शक्यताय आसा. सरकारान कामगार विरोधी धोरण लागू करप बंद करचें अशी मागणी अॅड. नायक हांणी केली.
हेर मागण्यो
फार्मा कंपनींत संप करपा आड लागू केल्लो कायदो रद्द करचो. पंचायत कर्मचार्यांक सातवो वेतन आयोग लागू करचो, कंत्राटी कामगारांक कायम करचे, कदंब कर्मचार्यांची बाकी दिवची, कमाल (चडांत चड) वेतन वाडोवचें, कामगार मंडळांची स्थापना करची ह्योय मागण्यो ह्या वेळार कामगारांनी केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
