भांगरभूंय | प्रतिनिधी
पणजीः गोंयांत 2019 त जाल्ले लोकसभा वेंचणुकेंत जाल्ल्या ‘नोटा’ वा वयले मदीं कोणूच ना’ अशी मतां 2024 चे वेंचणुकेंत मात्शी उणीं जाल्या. 2019 त वट्ट मतांच्या 1.46 टक्के मतांची टक्केवारी 1.24 इतलीच आशिल्ली.
वेंचणूक आयोगा कडल्यान मेळिल्ले म्हायती प्रमाण, 2024 चे वेंचणुकेंत दोनूय मतदारसंघांत वट्ट 8 लाख 96 हजार 958 वैध मतां आशिल्लीं. हातूंतली 11 हजार 165 मतां नोटा आशिल्ली.
मतदारसंघा प्रमाण पळयल्यार उत्तर गोंय मतदारसंघांत 6,328 जाल्यार दक्षीण गोंय मतदारसंघांत 4,837 नोटा मतदान जाल्लें. उत्तर गोंयांत जाल्ल्या वट्ट मतदाना मदीं नोटा मतांचें प्रमाण 1.40 टक्के आशिल्ले. जाल्यार दक्षीण गोंयांत वट्ट मतदानाच्या नोटांचें प्रमाण 1.08 टक्के आशिल्लें.
2019 चे लोकसभा वेंचणुकेंत दोनूय मतदारसंघांत वट्ट 8,40,704 वैध मतां आशिल्लीं. हातूंतलीं 12,499 मतां नोटा आशिल्लीं. मतदारसंघा प्रमाण पळयल्यार उत्तर गोंय मतदारसंघांत 7,063 जाल्यार दक्षीण गोंय मतदारसंघांत 5436 नोटा मतदार जाल्लें. उत्तर गोंयां वट्ट मतदानां मदीं नोटा मतांचें प्रमाण 1.65 टक्के आशिल्लें. जाल्यार दक्षीण गोंयांत वट्ट मतदानाच्या नोटांचें प्रमाण 1.28 टक्के आशिल्लें.
देशांत सगल्यांत पयलीं 2013 च्या छत्तीसगढ, मध्यप्रदेश, मिझोराम, राजस्थान आनी दिल्लींत जाल्ल्या मतदाना वेळार नोटा हो पर्याय उपलब्ध करून दिल्लो. 2014 चे लोकसभा वेंचणुकेंत हो पर्याय पयलेच खेपे उपलब्ध जाल्लो. हाचे पयलीं एकाद्या मतदारसंघांत वेंचणूक लडोवपी एकूय उमेदवार पसंत नासल्यार नोटा वा वयले मदीं कोणूच ना, असो पर्याय दिवपाचो अादेश सर्वोच्च न्यायालयान दिल्लो.
विधानसभा 2022त 1.20 टक्के नोटा मतां
2022 त जाल्ले विधानसभा वेंचणुकेंत 10,629 नोटा मतदान जाल्लें. नोटा मतांची टक्केवारी 1.13 इतली आशिल्ली. जाल्यार 2027 चे विधानसभा वेंचणुकेंत 10,930 नोटा मतदान जाल्लें. नोटा मतांची टक्केवारी 1.20 इतली आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
