भांगरभूंय | प्रतिनिधी
पणजी : संवसारभर गोंयचें नांव वयर काडपी अंदूंचो पर्पल फेस्ट ९ ते १२ ऑक्टोबर मजगतीं युनो आनी समाजीक न्याय आनी सशक्तीकरण मंत्रालयाचे मजतीन जातलो. महोत्सवाच्या प्रतिनिधी नोंदणीचें उक्तावण मुख्यमंत्री डॉ. प्रमोद सावंत हांचे हस्तुकीं जालें. महोत्सवांत १५ परस चड देशांचो वाटो निश्चीत आशिल्ल्यान दिव्यांगांची जीण सुशेगाद कशी जातली, हाचेरूच महोत्सवांत भर दितले.
मुख्यमंत्री डॉ. सावंत हांणी बिरेस्तारा पत्रकार परिशदेंत महोत्सवाची म्हायती दिली. ह्या वेळार दिव्यांग खात्याचे मंत्री सुभाष फळदेसाय, सचीव प्रसन्न आचार्य, राज्य दिव्यांग आयुक्त गुरूप्रसाद पावसकार आनी संचालक वर्षा नायक हजर आशिल्लीं.
ह्या वेळार डॉ. सावंत हांणी सांगलें, थिंक इन्क्लुजीव – युनिवर्सल डिझायन फॉर एवरीवन हे संकल्पनेचेर आधारीत अंदूंचो पर्पल फेस्ट जातलो. दिव्यांगांच्या समस्यांचेर चर्चे खातीरची ती माची आसतली. फाटल्या पर्पल फेस्टाची प्रधानमंत्री नरेंद्र मोदी हांणीय तोखणाय केल्ली. गोंयांत जावपी पर्पल फेस्टाचो राष्ट्रपती द्रौपदी मुर्मू हांणीय उल्लेख केला. गोंयच्या पावलार पावल दवरून हेर राज्यांनीय आतां पर्पल महोत्सव जावपाक लागल्यात. फाटल्या पर्पल महोत्सवांत १५ देशांच्या प्रतिनिधींनी वाटो घेतिल्लो. अंदूंच्या महोत्सवांत १५ परस चड देशांचे प्रतिनिधी वाटेकार जातले. दिव्यांगांची जीण सुशेगाद जावचे खातीर अशे तरेच्यो सुविधा निर्माण करच्यो, तशेंच तांच्या समस्यांचेर उपाय काडपाची चर्चा महोत्सवांत जातली. दिव्यांगां खातीर उपकरणां, तंत्रज्ञान, अभ्यासाची साधनां कशे तरेन निर्माण करचीं पडटलीं, हाचेर चर्चा जातली. दिव्यांगांकूय सामान्य लोकां वांगडान आसपावन घेवन तांच्या सशक्तीकरणाचो उद्धेश हो महोत्सव आयोजीत करपा फाटलो आसा.
दिव्यांगां खातीर विशेश करून ग्रामीण भागांत जायत्यो समस्या आसतात. भलायकी, शिक्षण, येरादारी ह्या सेवांचो हेरां प्रमाण तांकां लाव घेवपाक मेळना. दिव्यांगांक शिक्षण, भलायकी आनी येरादारीच्यो सुविधा घेवपा खातीर तंत्रज्ञान तयार करपाचें आव्हान आसा, अशें मंत्री सुभाष फळदेसाय हांणी म्हणलें.
प्रतिनिधी नोंदणी वेबसायटीचेर वा मोबायल अॅपार करपाची सुविधा आसा. प्रतिनिधी नोंदणीच्या अॅपाचो डॉ. सावंत हांचे हस्तुकीं उक्तावण जालें.
अंदूंच्या महोत्सवांत कितें आसतलें?
अंदूंच्या महोत्सवांत जलक्रीडा, पॅरासेलींग, स्कुबा डायवींग जातलें. दिव्यांग मनीस पेंवपाक शकतात, जलक्रीडा करपाक शकतात. दिव्यांगांचे पेवप, जलक्रीडा पळोवपाची संद ह्या महोत्सवांत मेळटली. दिव्यांगां खातीरच्यो उपेगी वस्तू, उपकरणां आनी सेवांची म्हायती दिवपी स्टॉल्सांचें प्रदर्शन महोत्सवांत आसतलें. पर्पल केलीडोस्कोपांत संगीत, नाच, विज्युअल आर्टस हाचेर आधारीत खास दिव्यांगां खातीर कार्यावळ जातली. पर्पल स्पोर्टस विभागांत क्रिकेट, हेर खेळांचे प्रकार जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
