भांगरभूंय | प्रतिनिधी
भारतीय मल्ल अंतिम पंघलान भारताक फुडल्या वर्सा जावपी ऑलिम्पिक खेळां सर्ती खातीर कुस्तींत पयलो कोटा मेळोवन दिलो. सर्बियाच्या बेलग्रेडांत चालू आशिल्ले संवसारीक कुस्ती वस्तादपण सर्तींत तिणें कांश्या पदक जिखलें. अंदूंच्या हंगामांतलें हें पदक लेगीत आसा.
अंतिमान 53 कील वजन गटांत कांश्या पदका खातीर जाल्ले मॅचींत स्विडनाचे एमा जोना डॅनिसाक 16-6 अशा फरकान हारयली.
आशियायी खेळा खातीर आयोजीत राष्ट्रीय निवड चांचणेंत जैत जोडून लेगीत तिका स्टॅण्ड बाय दवरल्या आनी तिचे सुवातेर विनेश फोगाटाची चांचणेंत वांटो घेनासतना लेगीत आशियायी खेळां सर्ती खातीर निवड केल्ली. पूण, विनेश शिबिरांत जखमी जाली आनी अंतिमाक संद मेळ्ळी.
19 वर्सां पिरायेचे अंतिमान आपले पयले मॅचींत सध्याची वस्ताद अमेरिकेची डोमिनीक ओलिव्हिया पॅरीसाक 3-2 अशा फरकान हारयिल्ली.
दुसरे फेरयेंत पोलंडाचे रोकसाना मार्टा जसिनाक टॅक्निकल सुपरियॉरिटीच्या आदाराचेर हारयिल्ली. क्वॉर्टरफायनलींत रशियेची नॅटली मलेशेवाक 9-6 फरकान हारोवन सेमी फायनलींत सुवात मेळयिल्ली.
सेमी फायनलींत मात अंतिमाक बेलारुसाचे वेनेसा कालजिन्सकाया कडल्यान 4-5 फरकान हारली. ताका लागून तिका कांश्या पदका खातीर खेळचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
