भांगरभूंय | प्रतिनिधी
पणजी: अंतर्गत (हिंटरलँड) पर्यटनाक उर्बा दिवन रोजगार निर्माण करपाचे सरकाराचे यत्न आसा, अशें मुख्यमंत्री डॉ. प्रमोद सावंत हांणी सांगलें. संवसारीक पर्यटन दिसाचीं समेस्त गोंयकारांक परबीं भेटयतना तांणी सन, सँड ऍन्ड सी हाचे मुखार गोंयचें पर्यटन वचपाक जाय अशी गरज उक्तायली.
खांडेपाराच्या एका फार्माचेर पर्यटन आनी टीटीएजीन पर्यटन दीस मनयलो. डॉ. सावंत कार्यावळीक हाजिर आशिल्ले. संवसारीक पर्यटन दिसाची कार्यावळ पयलेच खेपो गांवगिर्या वाठारांतल्या एका फार्माचेर जाता. अंतर्गत (हिंटरलँड) पर्यटनाक उर्बा दिवपी ही गजाल आसा. गोंयचें पर्यटन हें फकत सन, सँड ऍन्ड सी इतले पुरतेंच मर्यादीत उरपाक फावना. तें गावगिर्या वाठारांत पावपाक जाय. अर्थवेवस्थेक उर्बा दिवपा खातीर पर्यटन वाडपाची गरज आसा. ते खातीर कुशळ मनीसबळाची गरज आसा. हातुंतल्यान रोजगार निर्मितीक वाव मेळटलो. पर्यटकाक थळावें जेवण, खाण मेळपाक लागलें जाल्यार स्वयंपूर्ण मोहीम फुडें वतली. पर्यटनांत लेगीत थळाव्या गजालींचेर भर आसपाक जाय. वेलनेस, वैजकी, अध्यात्मीक पर्यटन वाडपा खातीर टीटीएजी सयत हेर जाळवणदारांनी यत्न करपाक जाय. तांणी सहकार्य करचें, असो उलो डॉ. सावंत हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
