भांगरभूंय | प्रतिनिधी
बीजिंग, खबरां संस्था ः अंतराळांत लाखांनी वस्तू आसात, ज्यो धर्तरेक धोक्याच्यो थारूंक शकतात. अमेरिकन अंतरिक्ष एजन्सी ‘नासा’न ह्या धोक्याक आडावपा खातीर डार्ट मिशन पुराय केल्लें. ताचे खाला एक स्पेसक्राफ्ट क्षुद्रग्रहाचेर पडलें आनी ताका लागून फुडाराक जावपी धोको टाळपाचो यत्न करूं येता काय ना ,हाचो अभ्यास केलो. आतां चीनानय अशीच येवजण आंखल्या. तांणी अंतरिक्षांतल्या खडपांचो अभ्यास करपाचें थारायलां. हें मिशन 2030 वर्सा मेरेन पुराय जावपाची शक्यताय आसा.
स्पेसडॉटकॉम आनी द प्लॅनेटरी सोसायटीच्या खबरां प्रमाण, चीनान आपलें लक्ष्य दवरलां. चायना नॅशनल स्पेस अॅडमिनिस्ट्रेशन (CNSA) नदरेक 2015 XF261 नांवाचो एक क्षुद्रग्रह आसा. ताचो आकार सुमार 100 फूट रुंद आसा. नासाच्या जेट प्रोपल्शन लॅबोरेटरी डेटाबेसा प्रमाण 2015 XF261 हो क्षुद्रग्रह 9 जुलयाक धर्तरे लागीं आयल्लो. तो धर्तरेच्या गिऱ्या सावन 50 मिलियन किलोमिटर अंतरा वयल्यान गेलो. त्या वेळार ताची गती वराक 42 हजार किलोमिटर इतली आशिल्ली.
अमेरिकेचें डार्ट मिशन कितें आशिल्लें?
2022 वर्सा अमेरिकन अंतरिक्ष एजन्सी नासान डार्ट मिशन पुराय केलें. 26 सप्टेंबर 2022 दिसा नासाच्या डबल क्षुद्रग्रह रिडायरेक्शन टेस्ट (DART) ह्या स्पेसक्राफ्टान डायमोर्फोस नांवाच्या क्षुद्रग्रहाक धपको दिलो. हाका लागून क्षुद्रग्रहाची कक्षा बदलतली काय ना हें नासाक जाणून घेवपाक जाय आशिल्लें. हें मिशन येसस्वी जाल्लें. फुडाराक जावपी अशा घडणुकेक लागून क्षुद्रग्रहाची दिका बदलून धर्तरेक धोक्याचे आशिल्ले क्षुद्रग्रह धर्तरे सावन पयस धुकलूं येतात असो निश्कर्श नासान काडला. आतां चीनय तशें करपाची येवजण आंखता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
