भांगरभूंय | प्रतिनिधी
वॉशिंग्टन, खबरां संस्था: अमेरिकन अंतराळवीर सुनीता विल्यम्स णव म्हयन्यां उपरांत हालींच आंतरराष्ट्रीय अंतराळ स्टेशना वयल्यान धर्तरेर पावल्या. अंतराळांतल्या तांच्या णव म्हयन्यांचे वसणुके मजगतीं थंयच्यान भारत कसो दिसता हे विशीं मूळ भारतीय सुनीता विल्यम्स हांणी अणभव सांगले. तातूंतहिमालय, मुंब आनी गुजरातच्या दर्यादेगांवेल्या नुस्तेंमार्यांचो खास उल्लेख केलो.
भारत अद्भुत आसा. आमी जेन्ना जेन्ना हिमालयावेल्यान गेलीं तेन्ना तेन्ना बुच विल्मोर हांणी हिमालयाचे कांय फोटो काडिल्ले, ते खरेंच अजाप करपा सारके आसात. अंतराळांतल्यान हिमालय एका ल्हारा वरीं दिसता, अशें विल्यम्स हांणी सांगलें.
मुंबई आनी नुस्तेंमारांचो खास उल्लेख
म्हाका दिसता जेन्ना तुमी पुर्वे कडल्यान गुजरात आनी मुंबय भागांत वता तेन्ना थंयच्या दर्यादेगां लागसारा नुस्तेंमारी करपी बोटींवेल्यान तुमकां ‘आमी पावलीं’ अशी शिटकावणी मेळटा. ह्या शब्दांत विल्यम्स हांणी तांचें अंतराळांतले अणभव सांगले.
भारत भेटीचेर भाशण
मजगतीं हे पत्रकार परिशदेंत विल्यम्स हांणी तांचे येवपी भारत भेटीचेर भाशण केलें. तिणें म्हणलें, म्हाका आस्त आसा हांव म्हज्या बापायच्या देशांत वतलीं. थंय हांव ऍक्सिओम मिशनाचेर वचपी भारतीय अंतराळवीरांक मेळटली. आमी आमचे अणभव ताचे वांगडा वाट्टले.
अंतराळ मळार भारताची उदरगत
सुनीता हांणी अंतराळ संशोधनांतल्या भारताचे उदरगतीची तोखणाय केली. भारताच्या यत्नांक सहकार्य करपाची इत्सा उक्तायली. तांणी भारताचें वर्णन एक महान देश आनी अद्भुत लोकशाय अशें केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
