भांगरभूंय | प्रतिनिधी
खबरां संस्ता
बेनोनीः भारतांत जाल्ल्या वन-डे वल्ड कप फायनलीची पुनरावृत्ती बेनोनीच्या व्हिलोमुरे पार्कार घडली. भारताच्या वरिश्ठ पंगडा भशेन युवा पंगडाचें लेगीत संवसारीक चॅम्पिय़न जावपाचें सपन भंगलें. कांय म्हयन्यां आदी वन-डे वर्ल्ड कपांत रोहीत शर्माच्या भारतीय पंगडाक फायनलींत ऑस्ट्रेलियेन हारयल्लें. अशीच अवस्था भारतीय अंडर- 19 पंगडाची आयतारा जाली. अंदूच्या अंडर-19 संवसारीक करंड सर्तींत ऑस्ट्रेलियेन भारताक 79 धांवड्यांनी हारोवन चवथे फावट व्हो करंड जिखपाची कामगिरी करतना हे सर्चीचे फायनलींत भारताक पयलेच फावट हारयलें.
ऑस्ट्रेलियेन जैता खातीर 254 धांवड्यो करपाचें बरेंच कुस्तार अशें लक्ष्य हातासपाक भारतीय पंगड सामको अपेशी थारलो. थारायल्ल्यो 50 ओव्हरी लेगीत भारतीय बॅट्समन खेळपाक शकले नात. 43.5 ओव्हरींत फकत 174 धांवड्यो ते करपाक शकले. ओपनर आर्दश सिंह (47) आनी सकयल्ले फळयेंतलो मुरूगन अभिषेक (42) ह्या दोगानीय ऑस्ट्रेलियन बॉलरांक तोंड दिलें मात ते पंगडाक जैत मेळोवन दिवपाक शकले नात.
आदर्श आनी मुरुगन सोडल्यार भारताच्या बाकीच्या बॅट्समनांक व्हडली खेळी करप शक्य जालें ना. पंगडांतले 7 खेळगडे दोट्टी धांवड्यो करपाक लेगीत अपेशी धारले. अर्शीन कुलकर्णी (3), कॅप्टन उदय सहारन (8), मुशीर खान (22), सचीन धस (9), प्रियांशू मोलिया (9), अरवली अविनाश राव (0), राज लिंबानी (0), सौमी कुमार (2) हे सामके अपेशी थारले. नमन तिवारी 11 धांवड्यांचेर नाबाद उरलो. ऑस्ट्रेलिये वतीन राफेल मॅकमिलान 3, मह्ली बीअर्डमनान 3 आनी कॉलम विडलरान 2 विकेटी घेतल्यो. चार्ली अँडरसन आनी टॉम स्ट्रॅकरान दरेकी एक विकेट घेतली.
ऑस्ट्रेलियेचें 254 धांवड्यांचें आव्हान
ऑस्ट्रेलियेन 50 ओव्हरींत 7 आवट 253 धांवड्यांचो दोंगोर उबो केलो. हे सर्तीच्या इतिहासांत पयलेच फावट एका पंगडान 250 धांवड्यांचो पांवडो हुपलो. सहारा पार्क मैदानाची खेळपट्टी बॉलरांक बरी आशिल्ल्यान ही धांवसंख्या आव्हानाची अशें दिसतलें तें खऱें जालें. टॉस जिखून ऑस्ट्रेलियेचो कॅप्टन ह्यू वैबगेनान बॅटींग घेतली. तांच्या डावांत हरजस सिंगान 65 बॉलांत 3 चौके आनी 3 सक्यांनी सगल्यांत चड 55 धांवड्यांची खेळी केली. ह्यू वैबगेन (48), ऑली पीक नाबाद 46 आनी ओपनर हॅरी डिक्सनान 42 धांवड्यो केल्यो. भारताच्या राज लिंबान सगल्यांत चड 3 विकेटी घेतल्यो. नमन तिवारीन 2 जाल्यार सौमी कुमार पांडे आनी मुशीर खानाक दरेकी एक विकेट मेळ्ळी.
रान लिम्बानीन मॅचीच्या तिसरे ओव्हरीत ऑस्ट्रेलियेचो ओपनर सॅम कोन्स्टॅसाक क्लीन बोल्ड केलें. उपरांत हॅरी डिक्सन आनी कॅप्टन ह्यु वैबगन हांणी दुसरे विकेटी खातीर अर्द शेकड्याची भागिदारी करून डाव साल्वार केलो. तमन तिवारीच्या पयले ओव्हरीं ताणी 15 धांवड्यो काडल्यो. 21 वे ओव्हरीत नमनात डिक्सन आनी ह्यू जोडी फोडली. ते उपरांत हरजस सिंग आनी ऑली पीक हाणी डाव साल्वार केलो आनी धांवसख्या 250 वयर व्हेली.
एकोणीस वर्सां पिराये सकयल्या खेळगड्यांचे हे संवसारीक क्रिकेट सर्तीच्या फायनलींत हाचे पयलीं खंयच्यान पगंडान 253 धांवड्यो करूंक नाशिल्ल्यो. 1998 वर्सा फायनलींत इंग्लंडान न्युझिलंडा आड खेळटना 242 धांवड्यो केल्ल्यो. हेच मॅचींत न्युझिलंडान आपल्या डावांत 241 धांवड्यो केल्ल्यो. आतां 253 धांवड्यो करून ऑस्ट्रेलियन सगल्यांत चड धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
