भांगरभूंय | प्रतिनिधी
पणजीः फोमेंतो रिसॉर्ट अॅण्ड हॉटेल्स प्रायव्हेट लिमिटेडाच्यो वेवस्थापकी संचालक/ मुख्य कार्यकारी अधिकारी अंजू तिंबलो हांकां सर्वोत्कृश्ठ ‘हॉटेल वेवसायीक’ पुरस्कारान भोवमानीत केली. शुक्रारा फेडरेशन ऑफ हॉटेल अॅण्ड रॅस्टोरंण्ट असोसिएशन ऑफ इंडिया वतीन (एफएचआरएआय) आयोजीत कार्यावळींत तांचो भोवमान केलो. ह्या वेळार केंद्रीय पर्यटन खात्याचे अतिरिक्त सचीव सुमन बिल्ला, आदले क्रिकेट खेळगडे जॉण्टी रॉड्स, संघटणेचे अध्यक्ष प्रदीप शेट्टी हाजीर आशिल्ले.
ते आदीं जाल्ले कार्यावळींत सुमन बिल्ला हांणी सांगलें, हॉटेल मळाक इन्फास्ट्रक्चर असो दर्जो मेळप गरजेचो आसा. अशें जालें जाल्यार उण्या दरांत रीण मेळप, बरी गुंतवणूक मेळप अशे खूबशे अर्थीक फायदे मेळटले. हे विशीं केंद्र सरकार विचार करता. हे खातीर हॉटेल मळार विदेशी गुंतवणूक लेगीत शक्य आसा. हॉटेल वेवसायांत गुंतवणूक वाडची हे खातीर देशांतल्या सगळ्या राज्य सरकारांनी यत्न करप गरजेचें आसा. ह्या मळाक सवलती दिवप गरजेचें आसा.
सध्या भारतांत जीडीपींत पर्यटन मळाचें योगदान 5.04 टक्के आसा. फुडल्या कांय वर्सांत ही टक्केवारी वाडोवपाचो आमचो हेतू आसा. 2029 मेरेन पर्यन मळार व्हड वाड अपेक्षीत आसा. फुडल्या कांय वर्सांत देशांत येवपी पर्यटकांची संख्या लेगीत वाडटली. ह्या मळार सुमार 10 कोटी रोजगार तयार जातले. हॉटेलाची गरज लेगीत ह्याच प्रमाणांत वाडटली. हॉटेल वेवसायिकांनी हे संदीचो लाव घेवप गरजेचें आसा, अशें बिल्ला हांणी सांगलें.
भारतांत सदांच उदरगतीची मानसिकताः जॉण्टी
जिवितांत आडखळ हीच संद आसता. एकादे गजाली कडेन वेगळ्या दिश्टीकोनांतल्यान पळोवपाक येवप गरजेचें आसा. अशें केलें जाल्यार आडखळी पयस वतल्यो. आपल्याक भारतांत सदांच उदरगतीची मानसिकता दिसल्या, अशें आदले क्रिकेट खेळगडे जॉण्टी रॉड्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
